Somali kiralongrartemi nisung 13 tepset

Somalia yimtiba Mogadishu nung aliba Dayah hotel nung bomb lendong ka atalokba sülen teyaritepertemi yirur aliba nisung ka anir aoba noksa nung angur.

Mogadishu, January 25 (Agencies) : Bodbarnü Somalia yimtiba Mogadishu nung Islamist kiralongrartemi hotel ka kishizüng nung car bomb ka pokdaktsü aser iba sülen hotel telungi ia nisung 13 tepset.
Kiralongrartemi Dayah Hotel telungi ai aser mapang tatsüka dang lir ano anameta bomb tanabuba pokdaktsü.
“Onoki Dayah hotel makdokogo aser nisungtem kümzükogo. Security force tem hotel telung nung lir aser onoki tatsüka lir osang tejangja metetdaktsü” ta Colonel Abdiqadir Hussein-i ashi.
Iba tatalokba nung security force aser civilian 13 asü aser 10 tema yirua lir. Ano tasürtem alitsü akok, ta Major Mohamed Ahmed-ia osangbener dang ashi.
2011 küm Mogadishu makdoker yimsü süa aruba Islamist telok- Al Shabaab-i iba tatalokba atema tenüng agiogo.
Tesüiba küm ana tsüngda African Union sepaitem aser Somali force temi jila aser yimtitem nung Al Shabaab anema mapa inyaka arur, saka parnok yimtsüngtem nungbo tashi itta lir.