Somali Parliament-i Tir anentsütsü benokba onük agiener

Nairobi, September 26 (Agencies): Somalia parliament züngsemtemi par Tir, Hassan Sheikh Mohamud yimsüsütsü menden nungi anentsütsü asoshi benokba onük agientsü lemtetba osang ka parliament speaker, Mohamed Sheikh Osman-i tanü Honibar nü metetdaktsüogo.
“Ozü yimsüsürtemi rongdak senden ka amenba sülen ozü linüki tang ajurua aliba yimtenren mangatettep ken o jembitepba ajanga bentettsü nangazüktep aser iba yongji, ozü Tir, Mohamud yimsüsü menden nungi anentsütsü asoshi tawa benokba onük agientsü lemtet,” ta Osman-i osang jangjashitsü.
Paisa ashiba agi, Tir Mohamud anentsütsü asoshi benokba onük nung oren kar aibelena inoksem saka kasaji jembitepba ajanga bentettettsü.
Somalia-i tang ajurua aliba yimtenren mangatettep ken o jembitepba ajanga bentettsü tajungshiba ka United Nations (UN)-i benokba sülen Somalia parliament-i tan iba telemtetbaji agir lir.
“Tir Mohamud-i ochimashi aser linük anema inyaker,” ta shia, taoba mapang pa pusemertemi Mohamud anema Tir menden nungi anentsütsü onükji benoka liasü.
Ajisüaka, pai aibelena meinyak ta shia, pa anema benokba onükji tamendakdak maliba onük lir ta Tir Mohamud-ia metetdaktsüogo.
Paisa ashiba agi, “Tan ni yimsüsütsü menden nungi anentsütsü onük benokba ajanga ozü sorkari yimtenren aser linük kümzüka ayutsüren nung terenlok ngua aliba ajak raksatsütsü. Anungji, iba ama inyakba maparen ya tamashi maparen ka lir.”
Ano külen, al-Shabab ta ajaba Islamic telungpurtemi par linük nung amakba aser iba amala lendong tsüdong mapang shia atalokdaktsüba ajanga par linüki taruba küm, 2016 agitsü ayonga Tir election magitettsüsa küma, par parliament züngsemtemi dang Tir tasenba shimtsü renemba osang ka Mohamud-i metetdaktsü.
Al-Shabab teloki tan September ita 21 nüa Mogadishu yimtiba nung tentetba presidential villa kimlaen bomb lendong tesashi ka atalokdaktsüba ajanga ishiba agi nisung 4 poksetba osang bushiteta lir.