Somalia: al Shabaab teloki bomb lendong atalokdaktsü; 20 shi pokset

Mogadishu, August 21 (Agencies): Somalia sorkar anemer, al Shabaab telungpur teloki Somalia nung bomb lendong 2 tashi tanü, Deobar nü atalokdaktsüba osang ka sorkar ketdangsertemi metetdaktsüogo.
Somalia anüdoklentip tsütsü, Puntland region kübok Galkayo jila nung bomb lendong 2 tashi atalokdaktsüba sülen nisung 20 shi poksetba aser nisung 30 shi yiruba osang tang tashi nung jangjaogo.
“Peisasa pokseta asütsü mulungteter al Shabaab telungpur züngsem kati truck gari nung alenokba bomb tesashi ka pokdaktsüba sülen minute 1 shi süir külen peisasa pokseta asütsü mulungteter telungpur tanga kati car gari nung alenokba bomb tanga ka pokdakja tanü sorkar tesepti amakba osang jangjaogo,” ta sorkar ketdangser, Halima Ismail-i osang jangjashitsü.
“Ozü teloki bomb 2 tashi pokdakja Galkayo jila nung tentetba sorkar tesep tanü amak,” ta al Shabaab telok otongdar, Abdiasis Abu Musab-ia tanü lendong atalokdaktsüba atema tenüng agia metetdaktsü.
“Tanü lendong nung mitkar aser nübur na densema, nisung 20 shi poksetba aser nisung 30 shi yiruba osang tang tashi nung jangjaogo. Ajisüaka, tanü lendong nung nisung asüba aser yiruba osangji tang jangjaba dang nungi timba akümtsü akok,” ta Galkayo mozüki doctor, Ahmed Sugule-ia metetdaktsü.
African Union mitkartem nungi teyari agia, Somali National Army mitkartemi Mogadishu yimti aser temeket tesemtem nungi makdokba sülen al Shabaab telok tang Somalia anüdoklentip tsütsü, Puntland nung tashi itshitsü tenzüka lir.