Somalia aser South Sudan linüktemi Britain sepai yoktsü

London, September 28 (Agencies): Britain Ato Kilonser David Cameron-i, Africa nung kiralongra mapa nokdangba nung yimjung asoshi inyakertem tali tashi itdaktsütsü asoshi Somalia aser South Sudan linük temi Britain sepaitem yoktsü, ta sangdongba media ajanga metetdaktsüogo.

Ato Kilonser Cameron-i, Somalia nung kiralongra mapa aser South Sudan nungi nüburtem tanga linüki jena osepba azüoktsü asoshi Britain-i UN aser African Union (AU) asoshi sepai agütsütsü, ta ashiba Guardian osangkaket ajanga metetdaktsü.

Somalia-i sepai 70 shi yoka yaritepdaktsütsü aser iba telok nung Islam telok al-Shabaab nungi amokmerenba azüoktsü asoshi ‘peacekeeping unit’ ka alitsü. Parnok yabo rara nung madentsü saka AU nem nüngdakba training dang agütsütsü.

South Sudan-i sepai 250 nungi 300 shi yotsü aser item sepaitem yagi inyakyim balala nung yaritsü, talisa engineering tsütsü tetuyuba agutsüba den raratsü atema training agütsütsü.

UN Secretary general Ban Ki-moon aser US Tir Barack Obama nungeri Hombar nü UN peacekeeping sentong ka lapoktsüba sentong akaba mapang Cameron-i pai nangzükba sepaitem agütsü.

“Alima nung nüngdakba training tapu balala agütsüba aser linük ajak kümzüka ayuba maparen nung Britain-a shilem tulu lir,” ta Cameron-i ashi.

“Somalia nung dang tatalokdak tensaji azüoktet nungbo Somalia aser Britain naprong asoshi tajungzük asütsü aser ibaji ajanga kiralongra mapa ajema kümdaktsütettsü,” ta pai shisem.

Pai, “International yimteni Africa linük süngjema kümdaktsütsü asoshi bendanga agüja inyaktsü kanga rongdang nüngdak ka kümogo, ta ashi.

Britain-i taoba mapanga yimjung asoshi mapa tulu inyaka aruogo.

Britain-i 2013 December ita South Sudan nung civil war tenzükba mapanga sen million pound 260 (US sen million 390) teyari agüja liasü.