Somalia: Tayimtsü nung pokshiba lendong atalok; 1 asü

Somalia: Tayimtsü nung pokshiba lendong atalok; 1 asü

Daallo Airlines Airbus A321 tayimtsüi Mogadishu Airport toktsür minute 15 shi süir külen anüng tum nung pokshiba lendong ka yashi Mongolbar nü ajuruba sülen Mogadishu tayimtsü anendak tanaben anenzüktsüsüa akümba sülen agiba tayimtsü noksa kar yangi angur. (Mogadishu, February 03)

 Mogadishu, February 03 (Agencies): Daallo Airlines teloki ketdang asüba Airbus A321 tayimtsü nung pokshiba lendong ka yashi, Mongolbar nü atalokba sülen tayimtsüji Somalia yimtiba, Mogadishu nung anenzüktsüsüa akümba osang ka sorkar ketdangsertemi tanü, Bodbar nü metetdaktsüogo.

“Daallo Airlines’er Airbus A321 tayimtsüi Mogadishu yimti toktsür Djibouti bushia aotsü tenzüker minute 15 shi nung anüng tum nung pokshiba lendong ataloka tayimtsü temang shilem tila ka pokdokba osang jangjaogo,” ta Somalia Civil Aviation Director, Abdiwahid Omar-i osang jangjashitsü.

“Tayimtsü shilem pokdokba sülen tapok ajanga aitba mupongi tayimtsü telung nung mena alir nisung ka atsüzüker ao aser iba nisungba indang tasümangji Mogadishu nungi anüdoklentip tsütsüleni kilometer 30 shi pilar Balcad tesem nung anguba osang jangjaogo,” ta pai shisem.

“Tan lendong ajuruba tayimtsüi nisung 74 tashi anir liasü,” ta shia, tan lendongji kechi timtem ajanga adok iba osang jangjashitsü asoshi bushisüngdang tenzükba osang ka Omar-i metetdaktsü.

“Tan atalokba lendong nung tayimtsüi anir nisung 2 yiruba osanga jangjaogo,” ta Daallo ketdangser, Mohamed Hussein-ia metetdaktsü.

Daallo teloki ketdang asüba tayimtsütemi Horn of Africa aser Middle East kübok tesem balalai nüburtem anir senzür.

Tan atalokba pokshiba lendongji Somalia nung mapang shia lendong atalokdaktsür Islamist kiralongrar telok, al-Shabaad mapa asütsü akok ta ketdangsertemi temulung malemba olen ka metetdaktsüogo.

Ajisüaka, tan lendong atalokdaktsüba atema telok shingaia tanü tashi nung tenüng agia metetdakja mali.

You must be logged in to post a comment Login