Somalia tir aliba ki anasa nisung trok pokset

Mogadishu, Luchii/Dec. 22 (Agencies): Somalia yimtiba, Mogadishu nung bomb tesashi ana poka iba lendong nung nisung trok asü, ta yangji aliba osangbenertemi ashi.
Mezüngbuba gari nung aliba bomb ya national theatre anasa checkpoint nung apok aser iba mapang anüngleni mokozü temelem tua liasü aser minute ishika lir kasa tesem nungsa tanabuba bomb ya apok.
Iba lendong atalokba tesem anasa yimten yimsüsür aser ketdangsertem kanga mazüngi senzüa liasü, ta police temi ashi.
Iba lendong nung Somalia indang Benadir region nung deputy governor, Mohamed Tulah yiru, ta Mogadishu nung aliba osangbener Mohamed Bulbul-i ashi.
“Iba tesem anasa sorkar ketdangsertem alir aser tesem ya kanga junga miter. Security bomber temi security checkpoint nung pokloktsü ta onoki angazük,” ta pai ashi.
Social media nung prokshiba noksatem nung gari poksar aliba aser iba tesem jana agi sünga prokshia aliba nguogo.
Mogadishu nung ita ka shi süngjema lia aruba mapang iba lendong ya ataloker, kong al-Shabab telungpurtemi mapang shia lendong balala agütsür.
Al-Qaeda den sendaktepa aliba telungpur telok, al-Shabab züngsemtemi Somalia aser kidanger linüktem nung lendang agütsür aser parnoki Somalia sorkar laodaktsütsü meranger aser Horn of Africa linük nung Islamic ozüng tesashi benoktsü meranger.
Iba telok ajanga Somalia alinük timba amokbanga lir saka 2010 nungbo iba telok ya tongtibang yimti aser jila tem nungi atsüngdokogo.