Somalia:Kilonser rongnung tanubusang khasetogo

Mogadishu, May 4 (Agencies) : Brihostibarnü Somalia security force temi linük kilonser rongnung tanubusang, arishi küm 31 tain, Siraji kiralongrar ta aibenlener khaset, ta ketdangsertemi ashi.
Abbas Abdullahi Siraji ji February 8, 2017 election sülen akümba Somali cabinet tasenba nung aliba kilonsertem rongnung tanubotisang liasü, ta osangbenertemi metetdaktsü.
Bodhbarnü guard temi telungpur indang gari ta temulung melemi bilemer akhaba mapang Minister of Public Works & Reconstruction, Siraji mener oyaa aliba gari nung akhadang pa khaset.
Somali Tir, Abdullahi Mohamed “Farmajo” Ethiopia semdangi aotsü liasü saka ajungben iba asü lendong ajuruba ajanga athi aser Brihostibarnü linük yimtiba nung agitsü aliba kilonser tasüsang asüpila sentong nung adentsü ta metetdaktsüba linük radio osang nung sangdonga liasü.
Kilonser Siraji khasetba nung densema aliba sepaitem ajunga aputsü Tir-i tetuyuba agütsüba sülen guard parnok pezü tashi pua lir, ta linük nung osangbenertemi ashi.
Siraji ya züngsem 25 agi akümba sorkar tasenba rongnung dena liasü. Iba cabinet nung tetsüra parnok trok dena lir. Somalia Sorkari rara ajanga teraksa adokba, kiralongraba aser ayawara nokdangtsü asoshi bendanga agüja inyaktsü telemtetba agir inyaker.