SON-i State Games for Disabled ayonger

Dimapur, November 10 (TYO): India’er Youth Affairs & Sports ministry aser Special Olympics Bharat kübok densemba Special Olympics Nagaland (SON)-i Nagaland nung aso ajen nung tangar memenepertem atema State Games for Disabled saisapong sentong Dimapur kübok Sovima nung tentetba Generation Countdown Youth Ministry (GCYM) nung tan November ita 11-14 nü tashi agitsü ayongogo.
Saisapongtsü tetoktepba ayongba ajanga Persons with Disabilities (PwDs) nisungtem taküm nung terenlok lidaktsütsü nükjidong nung 2009 küm tentetba angati agi teyari agütsür telok, SON-i Nagaland kübok district 11 tashi nung tan amala asayamong balala ayongba osang angazükgo.
National Games for Disabled sentong 4 aser International jenjang nung ayongba tetoktepba 2 densema, SON teloki India linük ajunga nung ayongba tetoktepba balala nung shilem agiba osanga jangjaogo.
Tan November ita 11 nikdongdang 1:00 ako nungi tenzüka asayartem tenüng züluoka, parnok telok balala lemzüktsütsü; November ita 12 nü nungi tenzüka November ita 13 anepdang 11:00 tashi tetoktepba agiba sülen nikongdang 1:00 ako nungi tenzüka, asayamong shibangba sentong agitsü aser November 14 nü asayartemi pei talidaki meyipa aotsü sentong renema lir.
Tan asayamong nung Athletics, Bocce, Soft Ball Throw, Badminton, Football, Volleyball, Kho-Kho aser Table Tennis tetoktepba agitsü renemogo.
Disability Certificate (DC) alirtemi asayadak atongba sülen DC xerox 1 den passport 2 tayonger nem agütsütsü aser DC malir asayartem atema asayadak DC renemtsütsü sentong renemba osang angazükogo.
Tanga tesem nungi arurtem nem tarutao sen menoktsütsü saka ticket malir asayartem nembo temonok senji memeyiptsütsü.
Pei talidak meyipa aonü Dimapur kübok Chumukedima aser Kohima nungi asayartem 6th Mile junction tashi tongtsütsü aser tanüngba asayar ajunga NST bus station tashi tongtsütsü renema lir.
Senzüsenpongtsü den sentakba osang tali jangjanertemi Ph. No. 8258893278 ajanga Coach Temsu Amri aser Ph. No. 8258979872 ajanga Coach Yanren Ovung den tongteprateptsü akok.
Ano külen, Medical Board (Specialist Doctors in Disabilities), District Hospital Dimapur aser Social Welfare Department-i November 12 anepdang 9:00 ako nungi tenzüka, PwDs asayartem CGYM nung tendangba sülen nungdakba kulikaket malir PwDs asayartem nem Medical Disability Certificate, tapet Social Welfare Identity Card aser Rail Concession Certificate agütsütsü.
Iba den sentakba osang jangjashitsü atema Ph. No. 9402025289 ajanga Coach Amongla aser Ph. No. 9856356756 ajanga Coach Achila den tongteprateptsü metetdaktsüogo.