Sonia arishi küm 70 ajunger, Rahul lenir asütsüla: Amarinder

Chandigarh, May 30 (Agencies): Punjab nungi Congress lenir aser Amritsar MP, Captain Amarinder Singh-i, Congress Tir, Sonia Gandhi temaba menden nungi alua Rahul Gandhi aser Priyanka Vadra na lenir südaktsütsü mapang tongogo, ta ashi.
News18 den interview agidang Singh-i, arishi küm 70 nungbo Sonia kanga anibelemogo aser temelenshi aginer, ta ashi.
Singh-i, “1998 küm nungi ni Sonia den külemi inyaksema arur. Laji lenir tajung ka ta ni reprangtetogo. La arishi küm 70 ajunger aser ni arishi küm 74 lir. Lanurtem atema mapang tongogo. Lai kanga meranga inyakogo. Lai linük tesem ajungalen inyaker. La anibelenmer asütsü aser temelenshi aginüa alitsü. Lai kar nem melenzüktsünüra ibaji tim dang, ta ni bilemer,” ta ashi.
May 19, 2016 nü state pongu nung assembly election agiba osang sangdongba sülen Congress lenir, Digvijay Singh-i “Tanü osang ya tejashitsüka lir, ajisüaka meimlai aliba ka masü. Onoki aiben kuli reprangshiogo, joko major operation ka agitsüla masü no (?),” ta lemsatepa liasü.