Sonia aser Rahul okataki arudang Delhi nung AFSPA benoktsüla: Swamy

New Delhi, December 17 (Agencies): BJP lenir Subramanian Swamy-i shidi ka ajanga Ato kilonser Narendra Modi dang, December 19 nü Sonia Gandhi aser Rahul Gandhi na okadaki aruba anogo nung New Delhi nung AFSPA benoktsüla ta mepishitsü.

National Herald ken o nung December 19 nü Congress Tir Sonia Gandhi aser tatong Tir Rahul Gandhi na Patiala House Court-i arutsü.

Swamy-i ashiba agi, taoba mapang taoba Ato kilonser Indira Gandhi court matsüngdangi arudang Congress-i inyakba amatu ano ataloktsüa akok.

“Iba ama tensa ka nung timtem adokdaktsübaji Congress puti otsü nung lir,” ta pai ashi.

Iba anogo nung state balala nungi Congress tongtitem aser Congress nungi chief minister tema arua adentsü aser Congress headquarters nungi court telunget tashi aotsü imlar. Iba anogo nung Youth Congress nung inyakertem dang party tashi sayutsü tuyuogo.

BJP lenir Swamy-isa, Gandhi kibong anema ashioktsüba (Indian Penal Code kübok section 420), Section 406 aser senotsü tim mesüi amshiba ken o-a benoktsüla. Item section ji bail magütsütetba temzüng alema inyakbatem lir, ta ashi.

Anungji tai tonglokja alirtem jagi bail memeshira mesüra court-i bail magütsüra parnokiji aputsü akok.