Sonia Gandhi aser Nitin Gadkari nati Mehbooba Mufti semdangtsü

Srinagar, January 10 (Agencies): Congress Tir Sonia Gandhi aser Union minister Nitin Gadkari nati tanü, Deobarnü Srinagar nung asür Jammu & Kashmir chief minister Mufti Muhammad Sayeed’er kibong den asüko lemsateptsü.
Sonia Gandhi-i Deobar nikongtsütsü Srinagar nung Mehbooba Mufti semdanga asüko lemsateptsü, ta Congress sangdong ka ajanga metetdaktsüogo.
“Iba sülen lai Srinagar nung asür chief minister meyong Gupkar Road residence semdangtsü aser Deobarnü sa New Delhi-i meyiba alutsü,” ta congress nung ketdangsertemi ashi.
Bharatiya Janata Party (BJP)-i ashiba agi, Gadkari-ia tanü Deobarnü Mehbooba Mufti den oa ajuruteptsü.
“Deobarnü Srinagar semdangba mapang Gadkari-i state BJP lenirtem den ajurutepa state nung sorkar tasen akümba tsütsü olemtep akatsü,” ta BJP nung otongdar Khalid Jahangir-i IANS dang ashi.
Tanü Deobarnü, Sayeed atema mangyim anogo pezü ajungnep 11:00 ako nung Anantnag district kübok Bijbehara nung aliba Dara Shikoh Park nung pa leper nung lokti sarasadem ka agitsü.
Ano nikongdang 1:30 ako nunga Mufti’er meyong Gupkar Road residence, Srinagar nung ano lokti sarasadem balaka agitsü.
Mufti ya anogo 14 nü tashi tashidak den kanga rarar, All India Institute of Medical Sciences (AIIMS), New Delhi nung January 7 nü asü.
Pa asüba sülen mangyim matem tashi par jala, Mehbooba Mufti-i chief minister asoshi tenangzükba magitsü ta ashiba sülen Jammu & Kashmir nung Angh yimsüsüba benokogo.
“Linük Tir den angatettepba sülen Governor N.N. Vohra-i tanü Honibarnü state nung Angh yimsüsüba benokba osang metetdaktsüogo,” ta Raj Bhavan nung otongdari Honibarnü metetdaktsü.
Iba ya masüdanga December 23, 2014 nü state nung Ang yimsüsüba benoka liasü.