Sonia Gandhi hospital nungi aluogo

New Delhi, August 14 (Agencies): Congress Party Tir, Sonia Gandhi nija hospital ka nung tesüiba anogo 11 tashi monga aruba sülen tanü hospital toktsüogo.
La dehydration timtem den  tapubang yiruba anepalua liasü.
Sir Ganga Ram Hospital nung la anepalur doctor temi, la temang tajungba kümogo aser la tapubang tabelen yiruba tang tajungba lir, ta ashi.
Ajisüaka Sonia dang anisüngzüktsü tuyuogo.
“Sonia Gandhi-i hospital toktsüdang la temang tajungba liasü. La dang anisüngzüktsü aser mozü maneni agitsü tuyuogo. La temang maneni tendangtsü atema taruba hopta lai hospital semdangtsü,” ta Hospital Board of Management Chairman, D S Rana-i ashi.
Arishi küm 69 tain Sonia ya Varanasi nung Roadshow ka nung shilem agidang temang mejungi akumba sülen hospital-i anir oa liasü.
Iba sülen Augsut 3, 2016 nü la tapubang tabelen surgery agia liasü.
Department of Pulmonology & Chest Medicine senior consultant, Arup Basu-i anir doctor telok kati la temang anepalua liasü aser Department of Orthopaedics nung senior consultant Prateek Gupta aser Mumai nungi  Dr Sanjay Desai nati la tabubang surgery agi.
August 2 ayaterm nung  Congress National Tir, Sonia Gandhi ya tamasa Army Research and Referral Hospital-i anir oa yariba sülen Sir Ganga Ram Hospital-i anir oa liasü.
August 2 nü Ato kilonser, Narendra Modi’er constituency, Varanasi (Uttar Pradesh) nung Sonia Gandhi-i 2017 Uttar Pradesh assembly election atema lar party nüboyim sentong tenzükja road show nung shilem agidang la temang mejungi akum.
Anüdoklen Uttar Pradesh nung assembly menden 403 nungi menden 160 shi lir aser iba tesem atema Varanasi ya tongtibang tesem ka lir.
2014 küm state Lok Sabha election nung Cong-i  Amethi aser Rae Bareli menden na nung dang takok ngua liasü.