Sonia Gandhi-i Manipur CM & Dy CM na tanaben jaoker

Imphal, March 20 (Agencies): Manipur nung Congress yimsüsürtem rongnung mangatettep adokba den sentakba onük benoka jembitsü nükjidong nung India Congress Tir, Sonia Gandhi-i Manipur Chief Minister, Okram Ibobi Singh aser Deputy Chief Minister, Gaikhangam na New Delhi-i jaokogo.
Ibobi aser Gaikhangam naprong Delhi yimtiba bushia tanü Deobar nü ogo aser tenati Sonia Gandhi aser Congress Tatong Tir, Rahul Gandhi na den ajuruteptsü sentong lir.
“Manipur Congress Legislature Party (CLP) züngsemtemi yashi, Hokolbar nü senden ka amen saka iba senden nung Ibobi-i taoba mapang Sonia den ajurutepdang onük benoka jembiba osang kecha melemsatep,” ta tang Ibobi lenisüba dak temulung masür yimsüsür kati metetdaktsü.
Paisa ashiba agi, taruba April 1 nü nungi tenzüka ozüng küma benshitsü aser Manipur nütsüng yongsük noklang nung shilem 87 ajangzükdaktsütsü asoshi latetba National Food Security Act den sentakba onük ang Ibobi-i yashi senden nung benoka liasü.
Ano külen, India nung tentetba Congress lenirtemi par General Secretary, V. Narayanswamy tetendanger ka ama Manipur-i tanü tashi meyoki aliba osanga jangjaogo.
Ano, minister kar agiena parnoki abenba menden yimsüsür tasen nem bendaktsütsü asoshi Ibobi-i benokba onüka CLP züngsem 48 rongnungi züngsem 25 shi densemba Ibobi anemer yimsüsürtemi magizüki lir.
Gaikhangam ministry nungi anentsütsü mesüra pai abenba party Tir menden aser corporation o tentet balala nung mendenbuba shimtsü tashi agientsü nükjidong nung aser Ibobi-i taoba mapang nangzükba ama, ministry menden tanaben lemshitsü aser minister shia nem mapatong kaka dang bendaktsütsü takhangba Ibobi anemer yimsüsürtemi benokogo.
Manipur nung sangküm, February ita nung election agitsü ayongzüka lir aser election nung takok angutsü nükjidong nung Ibobi anemer yimsüsürtemi minister menden abentsü alizüng ayuba osanga angazükogo.
Tawa Arunachal Pradesh nung yimtenren temelenshi tulu agiba ama Manipur nunga ataloktsü akok ta bilema, India’er Congress lenirtemi tebilemtsü khuret benoka lir.
“Ibobi aser Gaikhangam nati Delhi nungi meyipa aruba sülen ang tan adokba mangatettep ajunga bentettsü imlar,” ta Ibobi anemer telok lenisangia metetdaktsüogo.