Sonia Gandhi-i Modi’er sorkar aitsür

New Delhi, Metsüremi (March) 17 (Agencies): UPA chairperson aser taoba Congress tir Sonia Gandhi-i Küptoknü (Honibar) BJP-i aniba Centre sorkar anema o aika jembidang, taoba sorkar mapang social welfare scheme tem tenzüka yutsüba ajak Modi’er sorkari tashi mait kümdaktsüogo aser senzüka yutsür ta aitsü.
“Modi sorkari UPA sorkar indang welfare schemes ajak tashi mait kümdaktsüogo asr iba atema ni mepelar” ta 84 buba Congress Plenary Session nung Sonia-i ashi.
Narendra Modi-i aniba BJP sorkar ya tekong kanga temerang aser tesüiba küm 4 tsüngda parnoki Congress samatsütsü atema meranga arur saka Congress-i temulung ila mebilemer aser kodanga yamaji mebilemtsü ta laisa shisem.
PM Modi-i ochimashi anema inyaktsü, ajaklen terenlok bener arutsü ta jembiba tu ajak tiyazü dang aser sorkar tashi angutsü atema jembiba dang liasü. Congress-i Modi’er tashiyim sorkar anema rarar aser 2014 küm BJP-i nangzükba ajaktu tiyazü liasü ta nübortemi angateta arudar, ta Sonia-isa ashi.
Taoba Prime Minister Manmohan Singh lenisüba kübok linük nung rongsenkettsüng jenjang kanga renloka liasü. Ozü sorkari nisung lakh aika sensak tia nungi anitet aser tanü Modi’er sorkari item mapa tajung ajakji tashi mait kümdaktsüogo, ta laisa aitsü.
PM Mdoi-i aniba sorkari ashikülak aser ochimashi mapa inyakba ajak jungkai adokdaktsütsü atema Congress-i mapa inyaker. Onoki kuli tejangja agüja PM Modi aser pa den inyakertemi ashikülak aser ochimashi inyakba kulitem jungkai adoka sayur, ta Sonia-isa shisem.
“Congress-i nübortem atsür arutsü atema mapa inyaker aser BJP atsüngdoktsü atema kasa tangatetba aliba party tem den külemi inyaktsü. Nübortemi Congress meimbaji linük nungi Congress party maitsü samatsütsü merangertemi memetet. Tanü teinyaktsü tongtipang ka lir aser ibaji Congress party tashi itdaktsütsü atema lir, ta laisa metetdaktsü.
Sonia-isa mapang tamajung ka nung lar jabaso Rahul Gandhi-i Congress Tir inyakba atema tenüngsang agütsü.
Party-i takok angubaji linük indang takok asütsü. Iba takokji asenok nisung shia indang asütsü. Congress ya yimtenren party ka dang masü saka movement ka lir, ta taoba Congress Tirisa shisem.
“Tanü nungi tapak tasen ka tenzüker aser akhidang ajuruba dang nungi tanü asenoki tayongzükba tasentem ajurua lir. Asenoki India nungi ochimashi aser mangyangtepba inyakyim agientsü atema tenangzükba agitsüla Tir Rahul Gandhi lenisüba kübok, asenoki iba tenangzükbaji agia mapa inyakdi ta ayongzüker” ta Sonia-isa ashi.