Sonia Gandhi-i NE nungi lenirtem den NRC atema jembi

New Delhi, Rongjui/September 13 (Agencies): Hokolbarnü Congress Party Tir, Sonia Gandhi-i north east state tem nungi party lenirtem ajurua National Register of Citizens (NRC) densema tongtibang onük aika nung o lemtepogo.
Iba senden nung North East nungi Congress lenirtem, taoba mapang chief minister tem, northeast states secretary in-charge, Luizinho Faleiro, taoba mapang Ato kilonser, Manmohan Singh aser Congress lenir, Ahmed Patel nunger dena liasü.
Tesülen osangbenertem den jembidang Falerio-i, “Onok senden talangka amen. Onoki NE states nung ajangshiba timtem onük aika nung o lemtepogo. Lenirtemi tongtibang onüktem benokba sülen northeast coordination committees tashi itshitsü atema onoki lemtet. Onokisa Guwahati nung permanent office ka amenoktsü lemtetogo,” ta metetdaktsü.
Faleiro-isa, senden nung Assam nung NRC mapatong indanga benoka o lemtepogo, ta ashi.
“Mapang shia senden ayongzüka northeast state tem nung tebilemtsü onüktem atema o lemteptsü onoki lemtetogo. NE nung tebilemtsü onük timba akümer, anungji iba ya ajema kümdaktsütsü atema onok longjemtsüla,” ta paisa ashi.
Congress lenirisa, senden nung Citizenship Amendment Bill atema-a jembiogo, ta ashi.
Nikongdang Sonia Gandhi-i Congress-i yimsüsüba state tem- Punjab, Madhya Pradesh, Rajasthan, Chhattisgarh aser Puducherry nungi chief minister tem den senden ka amen.