Sonia Gandhi-i October 25 nü party lenirtem senden ayonger

New Delhi, October 23 (Agencies): Maharashtra aser Haryana nung Assembly election osang sangdongba sülen anogo ka lir October 25, 2019 nü Congress Party Tir, Sonia Gandhi-i lar kidang 10 Janpath nung party nung lenir taintem senden ka ayongzükogo, ta Bodhbarnü osang ka ajanga metetdaktsü.
Iba senden nung party general secretaries aser state in-charges ajak adentsü aser senden nung yimtenren tensa atema jembitsü.
Iba senden nungsa taoba Congress Tir, Rahul Gandhi, taoba mapang Ato kilonser, Manmohan Singh, Ahmed Patel aser KC Venugopal nunger densema lenir tain aika adentsü.
Haryana assembly nung menden 90 lir aser Maharashtra nung menden 288 lir.
Exit polls ajangabo state ana nung party-i tamakok mejungi angutsü, ta asadangtetogo, ajisüaka Congress-ibo state anaprong nung parnok menden aika nung takok angutsü imlar.
Congress lenirtemi ashiba agi, tan elections nung BJP-i Arrla 370 agienba aser tanga onüktem nung ajemdaker toktep, ajisüaka nüburtem atemabo tanga onüktem ang tongtibang liasü.
Taoba Congress Tir, Rahul Gandhi-i state anaprong nung election atema nüboyimdang BJP-i aniba sorkar kübok linük rongsenkettsüng jenjang mejungi akümba indang jembia liasü, ta party lenir kati metetdaktsü.