Sonia Gandhi-i tenüng agi dang party Tir inyaker: Naidu

Hyderabad, March 18 (Agencies): Honibarnü Union Minister, M Venkaiah Naidu-i Congress tatong Tir, Rahul Gandhi aija, tesüiba küm 10 tashi Rahul-i Congress party anir, tetsü Sonia Gandhi-i party Tir ji tenüng agi dang inyaker, ta ashi.
“Taoba küm ter tashi Rahul-i party anir, Sonia ji tenüng ka agi dang party Tir inyaker,” ta BJP lenir, Naidu-i ashi.
“Kechi arudir aruaka Congress Party ya tzü telungi aiba rong ka lir,” ta paisa ashi.
Tawa Uttar Pradesh aser Uttarakhand assembly election nung Congress-i tamakok kanga mejungi anguba dak sentakba nung BJP leniri iba o ya jembiogo.
Congress Party-i Goa aser Manipur state assembly elections nung menden timba nung takok ngua single largest party kümaka parnoki state ana nung ya sorkar mekümtet. Iba mapang nungjagi tenzüka yimtenren lenirtemi Congress nung bangdak lenirtem, talisa Rahul Gandhi nem tai tongloktsür.
Ano külen tanü Lucknow nung party legislature senden mena Party legislature lenir shima Uttar Pradesh Chief Minister den Deputy Chief Minister ana shimogo.
Naidu aser BJP general secretary, Bhupendra Yadav nata iba senden nungji party central observers ama aden.
Asüng UP sorkar tezüngzüktep agiba sentong nung Ato kilonser, Narendra Modi aser BJP national Tir, Amit Shah nata adentsü.