Sonia-i anir Cong züngsemtem Parliament kima lungkak ait

Lok Sabha Speaker Sumitra Mahajan-i Congress MP 25 anentsüba anema August 04, 2015 nü Congress Tir Sonia Gandhi-i anir Congress MP tem Parliament House kima lungkak aitba noksa nung angur. Congress-i ashiba agi, par MP ajak Parliament nungi anenjaka ochimashi ken o nung dena alir BJP minister tem menden nungi maludaktsü tashi lungkak aittsü.

New Delhi, August 04 (Agencies): Yashi Lok Sabha Speaker Sumitra Mahajan-i Congress MP 25 anogo ponugunü anentsüba sülen tanü Congress Tir Sonia Gandhi-i anir party lenirtemi teka nung lisü tanak alener Parliament kima lungkak aitogo.
Lungkak aitba sülen osangbenertem den jembiba mapang Sonia-i, par züngsemtem anentsübaji democracy tepsetba lir, ta ashi.
Hombar nü Speaker Sumitra Mahajan-i agiba meraji tammang anogo ka lir, ta Sonia-i metetdakja liasü.
Taoba mapang Ato kilonser Manmohan Singh, Congress tatong Tir Rahul Gandhi aser senior party lenirtem densema Congress züngsem 50-i shii Ato kilonser Narendra Modi aser NDA sorkari tashi alia amshir ta taitsüba yimyim ayima liasü.
Iba den külemi Rashtriya Janata Dal, Nationalist Congress Party aser Samajwadi Party MP temia shilem agia Congress Party den külemi Parliament, Gandhi statue anasa lungkak aitogo.
“Parnoki ozü lenirtem anentsüba ya ajanga linük nung democracy tepsetba temaitsü sayur,” ta Sonia-i osangbenertem dang ashi,.
Rahul Gandhi-ia, “Ozü MP tem dang inyakba kasa ya, kaket rejutem, internet aser India nunger aluyimertem danga inyakogo,” ta ashi.
Paisa, Congress-i BJP minister tem menden nungi alutsü akhangba minister tem anema kuli teperi lir, ta ashi.
Taoba Ato kilonser Manmohan Singh, Sonia Gandhi aser Lok Sabha nung Congress Opposition lenir Mallikarjun Kharge nungeri Modi’er sorkar aitsüba den külemi External Affairs Minister Sushma Swaraj aser Chief Minister ana- Rajasthan CM, Vasundhara Raje aser Madhya Pradesh CM Shivraj Singh Chouhan nungeri Lalitgate aser Vyapam ochimashi ken o nung shilem agia lir, ta ashi.
Ano Aam Aadmi Party aser Trinamool Congress densema opposition party tekuia, Congress MP tem anentsüba asoshi parnoki Parliament nung madentsü ta sangdongogo.
Congress-i ashiba agi, par MP tem anentsüba ya Gujarat tatishitsü (Gujarat nung Modi chief minister küm 14 inyakba) ka lir.
Congress MP tem anentsüba dak sentakba nung Speaker-i, “Ni party ajak senden ka ayongzüka liasü, saka item sendentem nung telemtetba ka dangi maru. Iba yongji ni iba mera ya agitsüsa aküm,” ta ashi.