Sonia-i Bihar atema nübo ayimtsü

Patna, August 29 (Agencies): Asüng Bihar nung secular teloktep party tem atema nübo yimja Congress Tir, Sonia Gandhi-i lokti senden ka nung jembitsü, iba senden nung Rahul Gandhi bo medentettsü akok.
“Asüng Swabhiman rally atema Sonia Gandhi indang sentong onoki nguogo,” ta tanü state Congress tongti, Ashok Choudhary-i osangbenertem dang ashi.
Bihar chief minister Nitish Kumar aser RJD tongti lenir Lalu Prasad nati iba lokti senden ya Patna, Gandhi Maidan nung ayongzüka lir.
Choudhary-i, asüng nikongdang Sonia Gandhi ya (Patna) tonga arutsü aser indang-indanga senden alitsü tesemi aotsü aser senden nung jembiba sülen New Delhi-i meyipa aotsü, ta ashi.
Iba senden nung Rajya Sabha nung opposition lenir Gulam Nabi Azad aser party general secretary aser Bihar affairs in-charge C P Joshi nata adentsü.
Congress Party tatong Tir Rahul Gandhi-a arutsü asü ta asüngdangba langzüdang PCC tongti Ashok-i, Bihar nung nübo ayimtsü aser roadshow ayongzüka akatsü atema pabo tesülen ang arutsü, ta ashi.
Rahul-i Lalu Prasad den sabang ka nungi lemsatepa mejembinü nungbo koma süla ta asüngdangba langzüdang Choudhary-i, “Shibaji kongi aotsü’ar ibajibo party pangdak leniri dang lemtettsü. Talisa Congress tongti lenir arur asünungji, la den shirnoksa arutsü ta asüngdangtsüji menüngdaker,” ta ashi.
Ano iba senden nung Samajwadi Party tongti lenir Mulayam Singh Yadav-a dentettsü asü medentettsü’ar mejangja.
Iba senden nung party nung inyaker lakh 1.5 dak tema JD(U) aser RJD pusemertem den longjemtsü, ta paisa ashi.
Taküm September-October nung agitsü aliba Bihar Assembly election (menden 243) nung Congress-i menden 40 nungi tokteptsü.
Secular teloktep nungisa JD(U) aser RJD naprongla menden noklang kaka nungi tokteptsü.
Ato kilonser Narendra Modi aitsüba olen ka nung Chaudhary-i, Ato kilonser Modi-i Bihar atema sen lakh crore 1.25 sangdongba mapang Bihar auction süogo, ta ashi.
UPA sorkari state nem sen lakh crore 2 agütsüogo saka iba mapang nungji party-i yimtenren tajangzük angutsü asoshi mejembi, ta paisa ashi.