Sonia-i opposition lenirtem ajurutsü

New Delhi, April 30 (Agencies): July ita nung Tir election agitsü lia opposition party tem longjemer candidate ka shimtsü dak sendakba nung Congress Tir, Sonia Gandhi-i NDA nung madenba party tem ajurua senden amentsü, ta osang angazüker.
Sonia-i May ita tomlen tashi nung opposition party balala nungi lenirtem den senden amentsü aser state party temi nungita sentong kar renemtsü.
Opposition party tem longjemer candidate ka shimtsü sentong dak sendakba nung Sonia Gandhi-i Trinamool Congress tongti aser West Bengal Chief Minister, Mamata Banerjee dena jembitsü aser BJD, AIADMK den Shiv Sena lenirtem ayongsemtsü atema CPI(M) lenir Sitaram Yechury, Congress lenir, Ghulam Nabi Azad aser JD(U) lenir Sharad Pawar nunger nem mapa lemzüktsütsü.
“Kobi melii tezüngzüktep ka agitsü imlar,” ta JD(U) otongdar, K C Tyagi-i yashi ashi.
Tawa BJP-i UP assembly election nung takok tulu nguaka Electoral College nung parnoki vote tesadanga matonger. Tang teinyakdak Tir, Pranab Mukherjee kümsük July 25 nü tembanger, aser iba anogo matongdangsa Tir shimtsü.
BJP-i Tir shimtsü atema sentong yangluba jangjaba sülen Bihar Chief Minister, Nitish Kumar (JD-U), Sitaram Yechury (CPI-M) aser D Raja (Communist Party of India) nungeri taoba hopta mapang balala nung Congrese Tir, Sonia ajurua senden menogo.
Tir shimtsü atema Electoral College nung BJP-i ano vote 21,000 shi nüngdaker, anungji BJP-i aniba NDA sorkari AIADMK mesüra BJD party tem teyari nüngdaktsü.
March ita nung BJP den teloktep nung dena aliba party, Shiv Sena-i, India Tir tasenba atema Rashtriya Swayamsevak Sangh (RSS) tongti Mohan Bhagwat shimtsüa akok, ta metetdakja liasü.
Iba mapang nung Shiv Sena-i, “Hindu Rashtra” (Hindu linük) nükjidong ataloknüra Bhagwat Tir kümdaktsütsüla, ta ashi.
Ajisüaka Bhagwat-ibo, ni Tir menden nung amentsü mejangrar, ta shiogo. May ita tom sülen socialist lenir, Madhu Limaye sor küm 95 ajungba anogomung sentong nung opposition lenirtem sabang ka nung ajuruteptsü, aser iba senden nung Sharad Yadav, Digvijaya Singh, Sitaram Yechury, D P Tripathi, Atul Kumar Anjaan, Kamal Morarka aser Kunwar Danish Ali nunger densema opposition lenir aika adentsü.