Sonia-i PM Narendra Modi dang ‘Shahenshah’ aja

New Delhi, May 31 (Agencies): Mongolbarnü Congress Tir, Sonia Gandhi-i Ato kilonser, Narendra Modi-i “Shahenshah” (tamarener) ama benshir ta aitsüba sülen  BJP-i, süngo ayoker ka (Modi) India Ato kilonser akumbaji Congress Party-i magizükteter, ta aitsü.
BJP-i aniba NDA sorkar küm ana ajungba benjungmung amungdang tanep Sonia Gandhi-i sorkar aija, Ato kilonser, Narendra Modi ji “Shahenshah” lir, ta aitsü.
Rae Bareli nung osangbenertem den jembidang Sonia-i, “Ni kodanga yamai mengudang. Ato kilonser lir, ‘Shahenshah’ ka masü. Pa ya linük Ato kilonser lir. Linük nung sensak tia lir. Tzünglu maruba tebilemtsü lir. (sorkari) Yamai mezümeküma sayuba ya mapet,” ta jembia liasü.
Iba dak sentakba nung BJP otongdar, Sambit Patra-i Congress Tir aija, lai jembiba oji khenyongi majung, ta ashi.
“‘Shahenshah’ tetezü kechi’ar Congress-i ashitsüla, kechiyong küm jenti parnoki yimsüsüdang parnoki kibur ama linük yimsü süogo,” ta paisa ashi.
“Iba linük nung party ji kibur ama bilemer dang ‘Shansenshah’ ajar. Gandhi tem dak alaka shirnok dang Shahenshahs ajatsü. Parnoki iba linük ya parnok kibur ama yimsü süogo. Iba linük nung emergency adokbaji Indira Gandhi ajanga lir. Ibaji Shahenshah inyakyim lir. Ibaji kibong kati yimsüsüba lir,” ta Sampit Patra-i osangbenertem dang ashi.
Pai ashiba agi, Ato kilonserji kanga sensaker kibong nungi pai kanga meranga inyakba aser nüburtemi moatsüba ajanga temaba menden tashi ajungketba lenir ka lir.
“Ato kilonser dak sentakba nung, pa ya sensaker ka lir. Pa ya sünga ayoker ka lir. Pai meranga inyakba den külemi India nüburtemi temoatsü agütsüba ajanga pa India Ato kilonser akum,” ta Patra-i ashi.
“Kodang sensaker ka linük Ato kilonser kümdir, kibong ka nungi yimsüsürtemi ibaji magizükteter aser iba tejashi ajanga Sonia Gandhi aser Congress party-i item ama tai tongloktsür,” ta paisa shisem.