Sonia, Rahul nati Chopper aliba indang telangzüba agütsütsüla: Ravi Shankar

New Delhi, April 30 (Agencies): AgustaWestland Chopper alizükdang süpokrem agiba ken o nung Congress bangdak lenirtem anema tanü BJP lenir aser Union Minister, Ravi Shankar Prasad-i, UPA yimsüsüba mapang iba atema telemtetba agiba indang Sonia Gandhi aser Rahul Gandhi nati telangzüba agütsütsüla, ta ashi.
“AgustaWestland indang bangjemtepba aser tender melenshiba indang tangbo ajak temai adokdar. Congress party-i telangzüba agütsütsüla, Sonia Gandhi-i telangzüba agütsütsüla, Rahul Gandhi-i telangzüba agütsütsüla,” ta Prasad-i yangi osangbenertem dang ashi.
Taoba mapang Defence Minister, A K Anthony-i, kuli ngura Modi’er sorkari süpokrem agirtem nem temerenshi agütsüsüla ta jembiba dak sentakba nung IT Union minister Prasad-i, agency temi iba ken o bushisüngdangdar, ta ashi.
Prasad-i Sonia Gandhi dang, “Yimlibilema süpokrem agirtemji shiang, kechiyong telemteba ajak aser tender atema inyaktepba ajakji UPA sorkar yimsüsüba mapang liasü,” ta ashi.
“Iba ken o ya junga bushisüngdangtsü atema NDA sorkari inyaktsü aser ochimashi mapa tulu inyaka linük nem maksü bener arutsürtemji ozüng tsüngdangi anir arutsü,” ta pai ashi.
“Centre nung Modi’er sorkar tashii aruba asülen AgustaWestland tezüngzüktep agiba ken o bushisüngdang tenzükogo iba den külemi ozü sorkar tashii aruba sülen ang taoba NSA, MK Narayanan aser taoba Goa Angh, B V Wanchoo na dang asüngdangyar,” ta pai ashi.