Sonitpur district nung NDFB telok atsükba tesem amak

Guwahati, May 02 (Agencies): Assam nung aliba Sonitpur district nung National Democratic Front of Bodoland (NDFB) telok tashi itshitsü sentong renema aliba raksatsüogo. Paharpur tesem nung aliba arem min nung NDFB telokba tesem ya Gajraj Corps, Assam police aser COBRA Battalion ajanga April 30 nung makdok.
Itangiter temi NDFB telok aliba osang agütsüba sülen Gajraj Corps, Assam police aser COBRA Battalion longjemer Assam aser Arunachal Pradesh arrtsü nung aliba Paharpur min nung April 29 anepdang yakta mita bushi tenzük.
Iba sülen tasüng parnoki NDFB telok atükshia kazüba tesem nguteta amak. Arem min onsara tulu asüba ajanga NDFB purtem jena oadok. parnoki rifle ana, pistol ka, injang 50 aser grenade ka tena prangpong aser injang aika den raradang amshiba oset aika toktsür jena ao.
NDFB indang 3rd Battalion ya Sonitpur district nung kanga yakyakshiyaka lir ta osang angazüker. NDFB telungpurtem ya Assam aser Arunachal Pradesh arrtsülen lir aser parnoki ozüng alema tashiyim agi sen meshiba mapa tamajung inyaker.
“NDFB pur atsükshiba tesem maktetba ajanga parnok tashi itshitsü aser kümkümshitsü sentongtem raksatsür,” ta osang ka ajanga ashi.
Anu maneni osang tejangja angashiba sülen Gajraj Corps kübok Red Hornet Division aser Baksa Police longjemer April 30 nü mita bushiba mapang NDFB den sendaktepa alir nisung ka apu aser pa ket nungi AK-56 Rifle ana, linük nung yangluba rifle ana, 9mm pistol ana aser injang aika ngutet.
Assam, Baksa district nung alir arishi küm 33 tain, Nirmal Basumatary-a Simla anasa Bangaon yimtsüng nung apu aser pa ket nungi Gazimara rifle ka aser injang 12 ngutet.
Nirmal Basumatary-i ashiba nung ajemdaker Darrangamela nung alir Ranjan Boro aser Sntala Boro’er ki mita bushiba mapang AK-56 rifle ana den magazine pezü aser injang 10, country made rifle ka, 9mm pistol ana den magazine pezü aser injang 48, 0.303 injang ka aser 7.62mm injang ka ngutet.
Ranjan Boro aser pa kinungtsü ya tang tashi monguteti bushiba mapang lir.
Parnok ajak YA NDFB den sendaktepa aliba kisüng masü, saka tashiyim agi sen meshiba aser BTAD & MAnas Reserve Forest nung ozüng alema shiruru akhaba nung dena lir südi, ta temolung malemba osang ka ketdangsertemi metetdaktsü.