Sonowal-i India-Myanmar-Thailand Car Rally tenzüktsü

Assam Chief Minister, Sarbananda Sonowal-i India-Myanmar-Thailand (IMT) car rally sentong Guwahati nung tenzüktsüba noksa yangi angur. (Guwahati, November 19)

Guwahati, November 19 (Agencies): India-Myanmar-Thailand (IMT) car rally sentong takok ngua agiba ajanga India kübok Northeast state-tem aser kidangsüa, Myanmar aser Thailand na tsüngda tongtepratep aser shishilembatsü tesendaktep kanga agi tajungba akümtsü ta Assam Chief Minister, Sarbananda Sonowal-i tanü, Honibar nü metetdaktsüogo.
“IMT rally sentong agiba ajanga kidangsüa aliba Myanmar aser Thailand na den tongtepratep aser tesendaktep tajungba kümdakja, India Ato Kilonser, Narendra Modi-i tenzükba ‘Act East’ mapatong asangsang nung takok ngua inyaktsü lenmang sadema lapoktsütsü. Northeast region aser South East Asia nung tentetba linüktem na sentaktepdaktsüba ajanga Northeast nung kaketshisatsü bushitsü, temang anema alitsü aser mapa inyaktsü sabang nung terenlok aliba den raliwalitsü sabanga kanga agi tajungba akümtsü,” ta Rally sentong tenzüktsüdang Sonowal-i ashi.
Northeast region nung kiojen terenlok lidaktsütsü aser iba tesem nung tentetba state-tem sentaktepdaktsütsü nükjidong nung Assam sorkari Brahmaputra ayong nung nungdakba terenlok maparen inyaktsü bilemba olen ka lemsatepba den par state nung rongsenren terenlok lidaktsütsü nükjidong nung sobaliba, saisapongtsü aser tanü putu den sentakba sentongtem meyoktepa agitsü Brahmaputra Festival benjungmong taruba 2017 küm April ita ayonga agitsü renemba osang ka pai sangoktsü.
Indian Chamber of Commerce (ICC) aser Kalinga Motor Sports Club (KMSC), Bhubaneshwar nati ayongba IMT car rally sentong ya Ministries of Road Transport & Highways, Development Of North Eastern Region (DoNER), Petroleum & Natural Gas & External Affairs-i nungitba tongti saisapong mapatong ka lir.
Gari 21 aser gari anishir o teyariteper nisung 70 tashi shilem agiba kilometer 5,722 talang jajatsü rally sentong ya New Delhi nung tan November ita 13 nü tenzükba sülen rally nung shilem agirtemi Agra, Lucknow, Varanasi, Sarnath, Bodh Gaya, Patna aser Siliguri ajanga jajaba sülen tan November ita 18 nü Guwahati tonga liasü.
Parnoki maneni Meghalaya, Nagaland aser Manipur densemba Northeast ajangdanga aoba sülen Moreh point ajangdanga Myanmar tonga aotsü aser iba sentong ya Thailand kübok Bangkok nung taruba December ita 3 nü tembangtsü.