Sonowal-i Rajnath den ajurutep

Guwahati/New Delhi, March 26 (Agencies) : Deobarnü Assam Chief Minister, Sarbananda Sonowal-i Union Home Minister Rajnath Singh den ajurutepa senden ka amen.
Iba mapang Indo-Bangladesh arrtsü nung ayong aliba tesem dena tekaratiba nung atsüdangtsü atema Sonowal-i Rajnath dang ashi.
Sonowal-isa Assam den arrtsüa aliba state tem arrtsü atsüdangba mapa tekaraba nung tembangtsü atema Home Minister dang ashi.
Iba mapang Rajnath-i Indo-Bangladesh arrtsü atsüdangba mapaji mapa lemsar inyaktsü, ta ashi.
Indo-Bangladesh arrtsü atsüdangtsüba ya Bharatiya Janata Party (BJP)-i Assam nung election nüboyimba mapang jembiba onük tongtipang ka lir.
Tesüiba mapang Rajnath-i, ozüng alema bendangertem aruba inyakyim anendaktsütsü atema Centre-i India-Bangladesh arrtsü atsüdangtsü ta tenangzükba agüja lir.
Tanü Assam chief minister-i gondha ana jungnüa Rajnath den senden amen aser idangji pai National Register of Citizens (NCR), Assam Accord, kin trok nem Scheduled Tribe jenjang agütsütsü, Bodoland, police modernisation aser security force talila mapa lemzüktsütsü indang onüktem lemsatepa liasü, ta Assam Chief Minister`s Office-i sangdong ka nung metetdaktsü.