Sonowal ya tashi mait CM: Gogoi

Guwahati, January 16 (Agencies): Sarbananda Sonowal ya tashimait chief minister ka lir aser Assam nung Citizenship (Amendment) Bill anema noktakba mapang ka nung pai telemtetba shitak magitet, ta Assam nung Congress lennir tejen aser taoba chief minister Tarun Gogoi-i ashi.
“Sarbananda Sonowal ya tashi mait chief minister ka lir. Tanü pai bill atema tasü itta telemtetba ka magira, Assam tarutsü kanga majungtsü. Tashi mait Chief minister ka aliba ya Assam nungertem asoshi tesasatsüka lir” ta Gogoi-i ashi.
“Sonowal lenisüba tashi mait aser iba tebilemtsüji (Finance Minister) Himanta Biswa Sarma ajanga lir ta ni amanger. Iba jagi Sarma-i Assam nunger posemtsü melena, anema inyaker” ta paisa shisem.
Mepetmesü adokba mapang Sonowal mejanga liasü, saka tang pa saksalemtsüla aser Assam nunger dang nangzükba ama inyaktsüla, ta Gogoi-isa ashi.
Onoki Citizenship Bill anema maneni lungkak aittsü. Assam nunger dang iba bill mapa küma meinyakdaktsütsü ta onoki nangzüker. Iba bill meyipa magi tashi onoki anema inyaktsü, ta Gogoi-isa metetdaktsü.
Congress-i anema noktakba ajanga Bharatiya Janata Party-i aniba Centre sorkari Rajya Sabha nung bill magizüktet, ta paisa shisem.
Paisa ashiba agi, Chief Minister Sarbananda Sonowal-i aniba ministry nung AGP minister asemi mapa nungi anenba shiditem agütsüogo saka ano magizük lir.
Atul Bora, Phani Bhushan Choudhury aser Keshav Mahanta nungertem maneni minister tem lir kechiyong Chief Minister’s Office (CMO)-i Raj Bhavan dang parnok state Cabinet nungi anenba osang memetetdaktsü, ta Gogoi-isa ashi.
“Chief Minister’s Office-i Governor dangi shidi maben ta ni angashiogo. Chief Minister-i shidi yokra, Governor-i agizüktsü. Ajisüaka, kechiba Chief Minister-i Minister asem mapa nungi anenba shidi magütsü’ar ni mangateter” ta paisa shisem.
January 7 nü Lok Sabha nung Citizenship (Amendment) Bill, 2016 magizükdang anogo ka jelia AGP-i Assam nung BJP teloktep sorkar nung madentsü lemtet.
Iba sülen January 10 nü AGP minister asemi Chief Minister Sarbananda Sonowal nem parnok mapa nungi anenba shiditem agütsü.
Iba atema osangbenertemi Secretary to Assam Governor Prof Jagdish Mukhi, Sanjib Gohain Baruah dang asüngdangdang “Onoki ibaji memetet. Nenoki iba onük atema Chief Minister’s Office den tongtepang” ta dang langzü.
Ano külem, Chief Minister’s Office-ia iba osang memetetba indang dang ashi.