Sonu Nigam-i jembiba olen osangbenertemi aibelena angatet

Luchii/December 19, 2018 (Agencies): Sonu Nigam-i “ni Pakistan nungia dang sünüali” ta ashiba olen India nungertemi kanga jungrarabo magizük.
Agenda Aaj Tak Summit nung iba olen ashiba atema aitsüba sülen kentener-i Sangtennü iba ken o jangjashitsüogo.
“Khen khenbo osangbenertemi headlines tepor jungdaktsütsü mechi osang tejangja zütoker. Yashi Aaj Tak Summit kanga takok ngua kaogo saka parnoki kechi kümtsüar reprangang. Ni Pakistan indang jembiba ya India nung music company temi India nunger kentenertem dang kentenba sentong nung aazükba sen shilem 40 nungi 50 tashi meshir aser shirnoki iba taa agütsür parnok den dang inyaker, saka Pakistan densema tanga linük nungbo iba amaji memeshir ta shinüba liasü, saka parnoki ni Pakistan nung asoba tajungba süla ta melenshitsü,” ta pai olen mashi angateter adoktsüba atema India nung media aija ashi.
Music industry nung küm 20 dak tema shilem agia aruba sülen Nigam-i mapang shia music jenjang aser kentenertemi timtem ajuruba indang jembia aruogo.
India nung Pakistan nunger kentenertem nüngtugu akümba indang jembidang pai ashiba agi, “khen khenbo ni Pakistan nung asoba tajungba süla ta bilemer, ajita asünungbo India nungeri kü nem maongka agütsüla.”
Nigam-isa India nunger kentenertem mesenmetoi amshiba indang jembia liasü. “Tanü asüngbo kentenertemi sentong balala atema company tem nem taa agütsütsüsa akümer. Onoki sen magütsüra parnoki tanga kentenertem indang ken atemtsü aser parnok ajungkettsü aser parnok dang nungi sen agitsü,” ta pai ashi.
Pakistan nung kentenertem jenjang indang jembidang pai ashiba agi, “kechiba India nunger kentenertem dang yamai inyaker? Parnoki Pakistan nunger kentener yamai mebenshir. Atif Aslam ya kü medemer tajung ka lir aser pa dang show ka nung ken atentsü asoshi sen memeshir aser kasaji Rahat Fateh Ali Khan danga sen memeshir.”