Sonu Nigam-i kou sütok

April 19, 2017 (Agencies): ‘Azaan’ dak sendakba nung Sonu Nigam-i tweed asüba nung mepetmesü adokba sülen, Kolkata nung amenloker aliba tamangba yimsü nung lenir kati Sonu Nigam kolak nung kou sütoktsü asoshi jazüka liasü. Bodhbarnü osangbenertem den jembidang nüngtugu kenteneri iba tweed dak sendakba nung pa tebilemba lemsatepa. Pai ashiba agi, pai Islam anema kodanga mejembi saka loudspeaker tem amshiba anemadang jembi.
West Bengal Minority United Council nung tatongtir, Syed Sha Atef Ali Al Quaderi-i Nigam anema ‘fatwa’ ka agütsüba sülen pai iba ken o dak sendakba nung telangzüba tapet agütsüogo, ajisüaka pa kolak sütoktsüba ken o nung Syed Sha dak meinperonga bilemba kecha majitet.
Nigam-i zülutsüba nung mepelai Quaderi-i, nisung shibai Nigam kou sütoktsür, tsüngsem tejen agi azük yanglua azüktsür linük süa anir senzütetdir, sen lakh 10 sempet agütsütsü asoshi nangzüka liasü.
Quaderi-i telangzüba dak ajemdaker Nigami-i tanep Twitter ajanga pa tebilemba maneni lemsatepa liasü.
Osangbenertem den jembidang pai ashiba agi, pai tamangba yimsü kecha manemer, saka pa indang tweed ji mashileni angatet. “Ni secular nisung ka lir, iba olenji azaan anema masü saka ola speaker nungi tulu adokba anema liasü.” ta pai zülutsü.
Kenteneri maneni ashiba agi, pai tweet tem nung Gurdwara aser Temple tem nung loudspeaker tamshiyim shidak mamshiba atema shisema liasü saka shingaia ibajibo mangu. “Ni twitter nung essay ka mezülutettsü. Ni Temple aser Gurudwara indanga zülusemogo, saka shingaia iba nungjibo temolung agüja masadang,” ta paisa ashi.