Sonu Nigam tayimtsü telung nung ken tendaktsüba ajanga cabin crew tem mapa nungi anentsü

Mumbai, February 5, 2016 : February 4 nü Jodhpur nungi Mumbai-i aoba Jet Airways meyong tayimtsü telung nung aliba announcement system amshia Sonu Nigam nem ken tendaktsüba ajanga iba tayimtsü indang cabit crew tem ajak Hokolbarnü mapa nungi anentsüogo.

“Ozüng kübok tashi angatsü tesayuba agütsütsü aser aibelenba melenshitsütsü atema iba tayimtsü nung aliba cabin crew ajak tayimtsü duty nungi anentsüogo,” ta Jet Airways nung otongdari ashi.

Tayimtsü nung mena alir kari video tangokba nung Sonu Nigam T-Shirt ka semer “Veer Zaara” aser “Refugee” film tem nung pai mejema tentsüba ken ka ka atenba adoka lir.

Jet Airways telemtetbaji tangar akhüm metsübuba mapa lir, ta Sonu-i ashi.

“Ni tayimtsü nung fashion show sentong akaba ngudangogo. Tayimtsü telung nung ken atenba sentong akaba angashidangogo. Tayimtsü anir aser pa den külemi inyakertemi tayimtsü nung mena alirtem salabanglatsü asoshi asaya menüba ngudangogo. Tanga linüktem nungbo iba yimyaji jangratema benshir,” ta Sonu-i IANS dangi text message ka yok.

“Osang metetdaktsütsü mali azünga aliba ongdang ka nung kü dang tayimtsü nung inyakertemi tayimtsü telung nung aliba sound system amshia ken atentsü asüngdanga ken tendaktsüba atema mapa nungi anendaktsübaji tepela proker kar nem temerenshi agütsüba mesüka lir. Shingaia iba ama telemtetba tesashi anema kecha mashiba ya kanga tesasatsüka lir. Osangbenertemi danga iba dak sentakba nung tasüngdangba kar asüngdangtsü asü ? India nungera salabanglatsü mapang tongogo. Tangatetba nung anünga aliba ya ajanga tangar dang akhüm metsübuba adoker,” ta pai ashi.