Sony-i 5.1 home theatre system India nung sayaogo

Luroi/August 03 (Agencies): Japan indang electronics aser technology yangluba Sony-i 5.1 channel Soundbar home theatre system tasen ana India nung sayaogo. Sony HT-S700RF jenjang ji sen 37,990 aser HT-S500RF jenjang ji sen 29,990 asütsü. Home system anaprong ya Luroi/August 10 nü nungi tenzüka India tesem ajak nung angutsü.
Sony indang home theatre system tasenba nung tongti feature kaji 5.1 channel surround sound asütsü. Company-i iba home theatre system tasen atema wiring system tatakzük dang aguja lir. System ajunga nung wire asem dang keta alitsü aser item wire ya main speakers, sub-woofer aser speaker talila den atongtepa amshitettsü.
Sony indang HT-S700RF system ya tongtibang feature kar nung HT-S500RF system dang nungi balaka asütsü. HT-S700RF home theatre tejaklen aser tesülen tweeter anana keta aliba angutsü. Ajisüaka HTS500RF home theatre nungbo tejaklen tweeter ana dang inoka yanglutsü. Home theatre system anaprong nung woofer tasazük balala keta aliba angutsü. HT-S700RF nung 20cm sub-woofer aser HTS500RF nung 18cm asütsü.
Tanga feature dak sendakba balala ji speaker talila keta alibaji asütsü. HT-S700RF system nung tall boy speaker ana aser HT-S500RF system nung book shelf speaker ana keta aliba angutsü. Tanüngba specification tsütsü reprangdangra, temelenshi tilala kar dak alaka tangabo ajak kasa alitsü.
Connectivity tsütsü reprangdangra, home theatre system nung Bluetooth 4.2, USB port ka, HDMI port ka, optical audio port ka aser analog audio output ka keta aliba angutsü. HT-S700RF aser HT-S500RF home theatre system naprong nung 1000W audio output aser 5.1 channel surround sound inoka yanglutsüogo.
Music angatsü jangrartemi Bluetooth ajanga smartphone tem sub-woofer den connect süa amshitettsü. Iba den ano yarisemtsü atema ‘Sony Music Center app’ ajanga music control sütettsü. Ajisüaka, 5.1 channel sound system naprong yagi audio output ajanga Bluetooth music playback support masütsü.