Sopore nung grenade lendong nung nisung 15 yiru

Srinagar, October 28 (Agencies): Jammu & Kashmir kübok Sopore jila nung Hombarnü kiralongrartemi grenade ka pokdaktsüdang civilian 15 tashi yiru, ta police-i metetdaktsü.
Srinagar kübok Karannagar tesem nung kasa tatalokba ka nung sepai 6 tashi yiruba sülen tanü iba lendong atalokogo.
Civilian temji bus stand ka nung lia grenade ji pokloktsü. Parnok rongnung nisung kabo kanga mejungi yirur Srinagar hospital-i anir ao, ta osang ajanga ashi.
August 5 nü Arrla 370 agienba sülen Jammu & Kashmir nung security akanga alir. October 31 nü J&K ya union territory ana- Jammu & Kashmir aser Ladakh ta lemdangtsü.
October 26 nü CRPF telok kati checkpost ka nung garitem mita reprangdang parnok dak grenade ka pokloktsü.
Tan ita tetenzüklen Srinagar nung kiralongrartemi shishilembadak ka amakdang nisung 7 tashi yirua liasü.
2018 küm Pakistan nung amenoka aliba kiralongrartemi 328 tashi Jammu & Kashmir telungi aittsü merang aser 143 tashi takok ngutetogo, ta Home Ministry-i metetdaktsü.
Yaküm Jammu & Kashmir nung kiralongrar 257 aser sepai 91 tashi khaset, ta parnokisa ashi.