Sorkar advisers-ia rongsenkettsüng majungba nangzüker: Rahul

New Delhi, August 23 (Agencies): Hokolbarnü Congress lenir, Rahul Gandhi-i, sorkar indang advisers-ia tang linük rongsenkettsüng jenjang majungba nangzüker, ta ashi.
Rahul-isa Centre sorkar dang, merumerur nem masü saka nüngdakbapurtem nem sen agütsüba ajanga rongsenkettsüng jenjang yanglushitsüla, ta ashi.
Congress-i mapang talangka nungi linük rongsenktetsüng jenjang majungba indang tekümdangtsü shia arudar, ta shia Rahul-i, “Sorkar indang rongsenkettsüng advisor temia tatemsabo linük rongsenkettsüng jenjang majungba nangzükogo,” ta ashi.
Brihostibarnü Niti Aayog Vice Chairman, Rajiv Kumar-i, tesüiba küm 70 tsüngda India nung rongsenkettsüng tensa tang tamajungba, ta jembiba sülen Rahul-i tanü iba o ya jembir.
Tawa taoba mapang RBI Governor, Raghuram Rajan-ia, linük rongsenkettsüng ainba jenjang mezülongi akümba ya shisabulutsüsa ka lir, sorkari power aser non-bank financial sectors nung timtem adoka aliba atema inyaktsüla aser private sector investment atema inyakyim melenshitsüla, ta jembia liasü.
2018-19 küm India nunger rongsenkettsüng ainba shilem 6.8 tashi ajema aluogo, aser ibaji 2014-15 küm nungi tenzüka tang tashi nung tajemba lir. Taküm GDP ji shilem 7 asütsü ta sorkari asadangtet, ajisüaka Private experts aser RBI-ibo iba dang nungjagi tajemba asütsü, ta shiogo.