Sorkar akümtsü atema Mamata dang teyari memeshitsü: Congress

Kolkata, April 18 (Agencies): Tanü West Bengal Congress Tir, Somen Mitra-i, taruba sorkar akümtsü atema par party-i Mamata Banerjee-i aniba TMC dang teyari memeshitsü, mesüra hung Parliament ka asünunga la Ato kilonser akümtsü atema Congress party-i meyaritsü, ta metetdaktsü.
Election sülen nüngdak dang süra Mamata Banerjee-i BJP-a yaritsü, ta pai ashi.
“Onoki majority tera agi menguteti sorkar akümtsü atema teyari nüngdak ka asü nunga Congress-i Mamata Banerjee mesüra TMC dang teyari memeshitsü,” ta pai ashi.
“Onoki la teyari menüngdaktsü. Onoki UPA teloktep den külemi sorkar akümtsü. UPA-i majority angutsü,” ta Mitra-i ashi.
Banerjee-i aiben, la teyari magibo Congress-i sorkar mekümtettsü ta jembia arur. Taküm January ita Kolkata nung lai opposition party tem rally ka ayongzüka liasü, ajisüaka iba rally nungji Congress Party Tir, Rahul Gandhi-ibo maden.
Iba rally nung Rahul medenaka Congress-i party lenirtem- Abhishek Singhvi aser Mallikarjun Kharge na yok.
Arishi küm 77 Congress lenirisa, “TMC-i BJP-RSS den tangatettep yua alibaji Bengal nungeri meteta lir. BJP aser RSS den raratsüsa la jenjang ka nung mali, kechiyong election sülen lai BJP yaritsü melunga lir,” ta ashi.