Sorkar akümtsü meranger

New Delhi nung oagi monga taoba Chief minister aser tang MLA T.R.Zeliang-i pa chief minister ser Nagaland nung government akümtsü meranger ta NDPP teloki aija sangdongba osangji olulu osang kabo masütsü. Atangji, opposition leniri yimsü tesüdak purtem atsüngdoker yimsü asütsü merangbaji tim dang lir, ibaji kecha balaka meimlaba tesüngmangtsü osang ka masü. Tang ya Nagaland tatar senden nung tatar menden 60 aliba nungi tia majung Wb.Imtikümzük süadoker tatar ajak agi 59 dang lir aser par 59 nungia Speaker-bo tatartem rongnung nübo kasasa küma atsütepdangdang tebang aittsüba ashi, tatar senden nung tatartem ken o atsütepa tekolak züngdangtsüsa akümdangbo pabo mazüngtsü. Iba tatalokba aser inyakyim  jagi NDPP pur tatar ajak agi 16 amato dang kümadoker aser ano külen NPF purbo tatar 26 lir. Iba ama NNDP nung tashimait tensa tia ka reprangtetba agi, ashiko, NPF teloki PDA government atsüngdoktsü meranger asütsüa akok. Atangji, NPF tatar 26 süaka government mekümtet saka NNDP telokbo tatar 18 dang süaka government kümtet ta asübaji, talisa, BJP telok den election mapang nungi külem ser tangatettep nung aruba ajanga lir. Aji oda, election nung BJP teloki tatar menden 12 tashi ngutetbaji NNDP den tangatettep nung toktepba ajanga liasü ta angatetter, ashi BJP kija toktep asünungbo tatar menden paikajibo mengula ta bilemer. Ajisüaka, ano NDPP aser BJP na nungi adokba tatar ajak agi 30 dang asünungji, Independent MLA ka den NPP aser JDU (U) ama teloktemi meyari nungbo NDPP teloki aniba government mekümtetla. Iba ama tatsütep tulu nung tangar telok teyari agia government akümnungji, NDPP telok asoshia PDA government bener aoba ya ayong tulu ajanga yinzü apu nung aoer amai lir. Iba ama yimten tia ka nung PDA government taküm alitsüba ya tangar tatar aser telokji yutsür, BJP telok dak dang keta lir. BJP teloki yutsür moura tatem tashi otettsü saka BJP teloki toktsüra, iba anogo nungjisa opposition menden nung amentsüsa akümtsü. NDPP asoshi tarendaktsü aser takoksaji aji asütsü. Tang ya center nung BJP teloki anir yimsü asür, anungji par denji putepa alitsüsa akümer. Ano, Nagaland nung alir Naga nungertem asoshibo kecha yimten telok nükjidong tangatetba mali, saka kodaser teti government nung alitsü aser kodaser center government aniba telok den adentsü ta asüba nung dang aoer. Ibayongji, oagi center nung Congress teloki yimsü süra Nagaland nung ajak amato Congress akümtsü aser BJP süra ajak amato BJP akümtsü. Aji oda, election agitsüba mapanga asangurtem rongnung aiür topur ajung rakteper amato BJP den alitsü asoshi NPF telok o NDPP telok na kanga rakteper NDPP teloki kokogo. Iba tiaji BJP teloki kanga junga meteta lir, anungji parnoki aniba government mesüaka government-ji par mulungba nung aotsüsa government akümba yimya nungji adoker. Iba jagiang BJP nungi Deputy Chief minister menden nung mena lir. Ashiko, tanga teloki aniba government nung adentsü agibo BJP telokia parnoki aniba government-ang ka kümnütsü akok. Iba tebilemba aser nükjidong nung BJP teloki NDPP aser NPF nungi tatartem dang BJP akümtsü shia alitsü. Item ajakji yimten nung yimya ka dang lir aser yamaji jembia jembia asayamenü agi shitak aküm ama, ashiko BJP teloki government melendangtsüa akok. Ano ajaki bilema aliba mapang kaji, sangküm küm tetenzüklen Lok sabha election agitsü alinungji, iba election jagia Nagaland dak tashi agi kongshitsü. Tangbo BJP den tesendaktep alitsü rakteper saka center nung Congress arura Naga nunger ajak Congress nung adentsü. Iba ama tetsüngda mapang ka nung, tang Nagaland government tiaji ashitsü makokba tensa tia ka nung lir. Nagaland asoshi nüngdakbajibo ochishir aser pei lima aser pei nübortem meimba yimsüsürtem nüngdaker. Ajisüaka, tang ya Naga nunger asoshi kanga tia majung mapang ka, government melendi asüyonga majung aser memelenyonga majung ta tamajungbo tamajungsa asütsü.