Sorkar anemertemi yimjung mapang tongpang raratsü renemshir: Lavrov

Moscow, August 15 (Agencies): Syria nung tongpang raratsü anena mapang tatsüka yimjung alidang sorkar anemer talisa, Aleppo yimti aser yimti temeket nung tesep tenteta alirtemi tongpang takok ngua raratsü renemshiba olen ka Russia Foreign Minister, Sergei Lavrov-i tanü, Hombar nü metetdaktsüogo.
Russia kübok Yekaterinburg yimti nung Germany Foreign Minister, Frank-Walter Steinmeier den aroki osangbener den ajurutepdang Lavrov-i tanü iba olenji ashi.
“Tongpang raradak timtem toushi ajurushia alir nüburem nem nungdakba teyari oset aser chiyongtsü agütsütsü lenmang lapoktsütsü nükjidong nung anogo nung ghonda ishika meraratepi yimjung alir saka sorkar anemertemi iba mapang par telok tali tashi itshitsü aser tongpang takok ngua raratsü terenemshiba agir,” ta Lavrov-i metetdaktsü.
Aleppo yimti nung ghonda 3 tashi tongpang merarai yimjung aliba mapangji timtem toushi ajurushia alirtem nem teyari oset aser chiyongtsü agütsütsü asoshi meperiba olen ka Steinmeier-ia tanü metetdaktsü.
“Ghonda 3 tashi teyari agütsütsü mapang agütsübaji tangatsübo kanga dang junger saka asangsang nungbo iba mapang nung teyari osettsüset aser chiyongtsü lemshitsü makoker,” ta pai ashi.
Paisa ashiba agi, Aleppo nung tongpang rarabaren anena timtem toushi jenti ajurushia alir nüburtem nem tetsükdakba kecha meli nungdakba teyari oset aser chiyongtsü agütsütsü lenmang bushitsüla.
“Aleppo yimti nung timtem toushi ajurushia alir nüburtem yaritsü mesüra parnok südaktsütsüji Syria Tir, Bashar al-Assad-i aniba sorkar dak keta lir,” ta pai shisem.
Ano külen, Russia-i Syria anasa, Mediterranean tzüyim anüdoklen par mitkar renemshitsü sentong agitsü tenzükba osang ka Russia defense ministry-ia tanü sangoktsüogo.
Tanü nungi tenzüka agiba mitkar terenemshitsü sentong nung tongpang nung amshitsü long-range cruise missile kadoktetba Buyan-M corvettes ronga 2 tashi amshiba osang ministry-i metetdaktsü.