Sorkar dak dang memetaloki pei sasa meranga inyaktsüla

~ L. Kika Pongener, Aoyimküm, Dimapur.

Autorickshaw driver kati anogo ka nung sen noklang 700-800 junga aazüker aser iba nung jagi totzü inoker sen Rs.600/-bo tajemba agi anüngtsü, sürabangla ita nungbo Deobar anogo pezü intoker (26X600=Rs.15,60/-) angutsü.

Ano ibaji dang masü jila tulu nung joko tanu asüng office mapa ajak nung teka agi züluba mesüra type writer nung ajenba tu mamshir, saka ajunga computer typing asutsüsa adoker, anungji computer typing nung anogo shia sen jenti intoker. Ni Dimapur nung Computer typing-wala Bengali nunger asangur chanu ka dang nai
anogo nung nai sen kwi aazüker ta asüngdang nung tajemba agi sen meyirjang

kabo aazüker ta langzü. Sürabangla (26X1000=Rs.26,000/-) odang ayongayonga akhümbok nungmener aazüktsü.Aji oda bank nungi loan agir Computer aser printer machine ka alir ayongayonga shinga danga azü mekümi asen madak asen kibur ser aayanga chiyonga-jema alitsü lenmang sadema sadema yur item mapa ajunga asen lima nung tzüma-longmar nem dang maongka agütsür.
Taxi anitsü, autorickshaw anitsü aser computer typing asütsü mapa atemabo tazüngba degree tulu menüngdaker, mapa angutsü asoshi interview tatidang agütsütsü menüngdaker, mapa bushia tulur ki sema sempet tapu tapu bener tulur külema senzütsü kecha menüngdaker aser retirement küm tatakzük kecha maka, oda asen tashi agi akokba tashibo inyaktettsü.

Sürabangla iba amala mapaji tzümartemi dang masü asen Naga nungeri-a inyaktettsü masu no ??? Kechiba asen Naga nungerbo sorkar mapa dang imlatsü? mesüra sorkar dak dang metaloker alitsü ? Kechiba mapa meranga inyaktsüba ya maaksü amai nüma medangi bilemer ? Asen lima nung mapa inyakdi süra inyaker-a meinyakmai mapa paikati nangdaka yur tzüma-longmar nem dang inyakdaktsür no?

Kechiba asen Naga nungerbo belemseta züsentetba senotsü ajunga agi tzümartem dang takar kümdaktsütsü no??? Anungji asen Naga nunger lanurtemia tang nungi danga asentenshir asentzü sena mapa meranga inyaktsü angazükdi aser joko sorkar dak dang metaloker alitsüba tangatetba yabo melenshidi ta iba ocet ajanga lemsateper.

Iba Olemsabang nung lemsaba ken-o aser shisatsü ya iba ocet
zülur-i bilemba ken-o ama tazünger-i angateta agitsü mepishir