Sorkar doctor anisüngzüktsü küm 65 asütsü benokba Modi-i agizükogo

New Delhi, May 31 (Agencies): Sorkar doctor tem pei mapa nungi anisüngzüktsü atema arishi küm 65 (küm 63 aliba nungi küm 65) tashi atsülangtsü benoka liasü aser Mongolbarnü Ato kilonser, Narendra Modi-i ibaji agizükogo.
Iba ya tanü nungi mapa küma benoktsü.
Taoba hopta Saharanpur nung lokti senden ka nung jembidang Ato kilonser, Modi-i, linük nung doctor tali nüngdaker, ajisüaka par sorkar küm ana nungi ibaji inyaktsü tasak liasü, ta jembia liasü.
Iba mera ya ajanga mongin doctor temi pei wadang nung mapang taliba tenzüktettsü aser nüburtem, talisa sensakertem anema alibaren nung service tajungba agütsütettsü.
Union health minister, J P Nadda-i, iba ya ajanga linük nung health sector tsütsü sorkar tashi itshitsü, ta ashi.
Nadda-i, “Iba ya ajanga linük health tsütsü doctor tali agütsütettsü aser nüburtem atema benokba scheme balala benoka inyaktsü atema doctor tem nüngdakba ama ngua ministry-i meranga inyakba nung tashi itshitsü,” ta ashi.
Iba telemtetba ajanga state aser centre kübok tenzüker sorkar doctor tem ajak ayimjemtsü.