Sorkar-i RAW aser IB tongti tasen shimogo

New Delhi, December 17 (Agencies): Narendra Modi-i aniba sorkari Honibarnü Intelligence Bureau (IB) aser Research & Analysis Wing (RAW) nung tongtipur tasentem shimogo.
Anil Dhasmana India nung itdangiter telok RAW nung tongti asütsü shim, koba ajanga bendanglen nungi itdangitba osang bendener. Pa ya 1981 batch Madya Pradesh cadre officer lir.
Dhasmana ya Balochistan, kiralongra anema raraba aser Islamic Affairs nung kanga takotet lir. Pai RAW nung küm 23 tashi tenzüka aru aser pai Pakistan densema kanga tongtibang shilem agia lir.
Dhasmana-i Pakistan aser Afghanistan nung aika ajangshia lir. Pai London aser Frankfurt densema tongtiba yimtitem nung inyaka aru, iba den külemi SAARC aser Europe nunga inyaka aruogo.
Pai 1978-batch IPS officer Rajinder Khanna melentsü. Khanna ya mezüng süa RAW nung inyaka alir ka shimba lir.
RAW yagi tanga linüki indang itdangitraba maparen ketdangsüa repranger.
Intelligence Bureau nung tongti asütsü Rajiv Jain shim, koba ajanga linük telongtet nung itdangitraba repranger. Jain ya 1980-batch Jharkhand cadre officer lir. Pai 1970-batch Kerala cadre IPS officer Dineshwar Sharma melentsü.
IB tongti Dineshwar kümsük küm ana December 31 nü abensatsü aser January 1 nungi Jain-i melentsü.
Rajiv Jain ya President’s Police Medal angur ka lir aser pai IB department balala, talisa Kashmir amala nung inyaka aru.