Sorkar indang TB control scheme atema Aadhaar nüngdaktsü

New Delhi, June 21 (Agencies): Bodhbarnü Union Health Ministry-i sangdong ka ajanga tuberculosis (tb) tashidak agi shirangertem dang, Central sorkar scheme kübok tajangzük balala agitsü atema Aadhaar number agüjang, ta metetdaktsüogo.
Ministry-i Aadhaar card malirtem dang August 31, 2017 tashi nungbo Aaadhar enrolment agitsü metetdaktsü.
Union Health Ministry sangdong nungsa, “Iba scheme (Revised National Tuberculosis Control Programme- RNTCP) kübok teyari agitsü temsüa alirtemi Aadhaar number agütsütsüla,” ta metetdaktsü.
Aadhaar number malirtem atema health ministry-i Aadhaar enrolment facilities agütsütsü. Ano pei aliba jila mesüra block nung Aadhaar enrolment centre melira state sorkar department-i UIDAI den yaritepa tesemtesem nung enrollment facilities agütsütsü.
Kasa sangdong nungsa, iba scheme kübok teyari balala den senotsü teyari densema lir, ta metetdaktsü.
Tb agi shiranger ka Aadhaar number menguaka Aadhaar enrolment ID slip, Aadhaar enrolment centre mesüra voter ID, PAN card, bank passbook, ration card ama sorkar kulikaket lira iba scheme kübok teyari agia litettsü, ta sangdong nungsa metetdakja lir.
“Assam, Meghalaya aser Jammu & Kashmir dak alaka iba osang sangdongba anogo nungi tenzüka states aser Union territory ajak nung iba ya mapa küma inyaktsü,” ta ministry-isa ashi.
National Health Mission kübok Revised National Tuberculosis Control Programme (RNTCP) nükjidong ya tb tashidak tekaratiba nung puteta anepalutsütsü atema lir.
Tawa World Health Organization (WHO)-i, tamalen asadangtetba dang nungi India nung tb tashidak ya kanga tamajungba lir; 2015 küm iba tashidak tasen putetba shilem 60 aliba linük trok rongnung India densema lir, ta ashi.
Osang ajanga ashiba agi, 2015 küm India nung nütsüng lakh 1 shia nung nisung 217 bo tb tashidak keta lir.
India sorkari 2025 küm tashi nungbo linük nung iba tashidak meshimeshia samatsütsü sentong lir.