Sorkar ketdangsertem tangatetba melentsüla: CM Khandu

Itanagar, April 21 (Agencies): Ochimashi tongpang koktettsü asoshi sorkar mapa nung ketdangsertem tangatetba melenshitsü aser nüburtem tangatetba melenshitsütsü nung yaritsü asoshi Arunachal Pradesh Chief Minister, Pema Khandu-i Hokulbarnü ashi.
11buba Civil Service Day sentong nung o jembidang, “Ochimashi ta asüba ya asenoki meshidaki angateta lir aser iba ya nüburtem tensema level ajak nungi tenzüker. Iba tai ya tangatetba nung lir. Nisung ajak dak ochimashi lir ta nisung ajaki bilemer aser ochimashi maliba sorkar aginüra asenoki iba tangatetba melentsüla,” ta Khandu-i ashi.
“Iba tangatetba melenshiba ajanga mapa inyakba tesemtem tajungba akümtsü. Mapa inyakba tesem nung temelenshi aliba ajanga mapa inyaker yimya melenshitsü aser iba ajanga mapa tajungba inyaktettsü,” ta paisa shisem.
“Nüburtem atema mapa tajung inyaktettsü asoshi state sorkari Public Service Delivery Act 2015 yanglushi. Iba act ya mapa küma inyakyonga aotsü atema department ajanga tekeraba nung maparen tempangtsü asoshi ajungshir,” ta CM Khandu-i kasa sentong nung ashi.
“Yimsüsüba ren tajungba kümdaktsütsü asoshi shilem tulubaji lisoburi inyaktsüla. Ochimashi mapa ya ‘file’ aser ‘note’ tem ajanga tim lenmang masüba nungi arur. Kakettem mamshira ochimashi inyakyim samatsü aser iba tongpang koktettsü asoshi mapa ajunga ‘digital format’ nung dang inyaktsü. Sorkar mapa nung e-office project amshitsü asoshi Information Technology department den department ajungai amalitep alitsüla” ta CM-i Digital India indang onük nung ajemdaker ashi.
Arunachal Pradesh CM-i ashiba agi, “Temzüng aser ozüng aika akhidang yanglu- karbo India nunger nüchiso mangudang yanglu- aser item temzüng aser ozüngtem kar bo tanü-asüng tensa den mapet lir. Temzüng aser ozüngtem ya nüburtem ajangzüktsü asoshi yanglu, saka tensa den mapetba temzüng aser ozüngtem bo melenshitsü aser tajungba küma yanglushitsüla”.
Iba anogomong bilemteta mezüng Chief Minister indang ‘Award for Excellence in Public Administration’ tenüngtem metetdaktsü.
Kija nem agütsüba sempet ya sorkar mapa nung temelenshi bener arutsüba asoshi Finance Commissioner, Ashish Kundra nem aser merekmejuba asoshi Itanagar Municipal Council indang CMEO, Habung Lampung-na nem agütsü.
Telok mesüra lokdi nem agütsüba sempet ya Department of Information Technology nem agütsü.