Sorkar kijaibo ajak nem mapa magütsütettsü : Yitachu

January 7, 2016 nü Waromung nung Changkikong Kaketshir Mungdang 51 buba Lokti Senden nung tongti tesemdanger School Education & SCERT Minister, Yitachu pela agizükdang agiba noksa angur.

Waromung, Jan. 07 (TYO) : Loktiliba nung ochi ali nung dang nisungtem rongnung temeim aser aria bilemtep adoktsü ta tanü yangi Waromung nung Changkikong Kaketshir Mungdang (CKM) lokti senden nung tongti tesemdanger o jembidang, School Education & SCERT minister, Yitachui metetdaktsü.
Taküm ka takok ngua aotsübaji ochi dang lenmang asünungji ochi mapa inyaka taküm alitsübaji asenok ajak asoshi kanga tenüngdaktsü ta paisa ashi.
Kaketshirtem sorkar mapa nung dang nendaka melii peisasa mapa bushiteta inyaka aotsü asoshi tayongzükba ken o ka agütsü dang, alima nung kecha sorkaria nisung ajak nem sorkar mapa magütsütettsü, iba kasaji Nagaland sorkaria nisung ajak nem sorkar mapa magütsütettsü asünungji sorkar den külemi yaritepa nisung ajaki mapa adokdaktsütsüsa inyaktsübaji kanga tenüngdaktsü kümogo ta Yitachuisa metetdaktsü.
Paisa lanurtem dang ochishia alitsü asoshi tayongzükba o ka ashidang, Ochiji dang lenmang asünungji, ochiji Tsüngrem menden lir, anungji azükaru taküm ka küma alitsü asoshi ochi taküm alitsü merangtsüla ta metetdaktsü.
Kasa mungdang mapang, yimtsüng balala nungi arur teshimtet purtem den tongti tesemdanger sensaksemba mapang liasü aser iba mapang yimtsüng shia nungi kaketshirtemi pa dang tasüngdangba kaka asüngdanga liasü. Item tasüngdangbatem rongnung Nagaland nung kaketshisatsü tajung agütsütettsü asoshi sorkar tebilemba aser teinyaktsü sentongtem indang asüngdanga liasü. Item tasüngdangba ajunga tongti tesemdangeri kanga süoki ia langzüogo.
Tanü kasa mungdang sentong nung Naga Hoho tir, Wb. P Chuba Ozukumi tajungshi o tatsüka jembi aser Naga Orpheus Hunt winner Wabang Longkumeri ken ka tener senshi.