Sorkar küm pezü jungaka kechiba Lokpal metenteter: Rahul

Ramagurga (Karnataka), Tsüklai 26 (Agencies): Tanü Congress Party Tir, Rahul Gandhi-i, Ato kilonser, Narendra Modi-i takartem pusema inyaker, ta aitsü.
Paisa, kechiba Ato kilonser, Modi-i ochimashi anema tang tashi Lokpal meteteter, ta asüngdang.
Gandhi-isa, Punjab National Bank dak sendakba ochimashi ken o nung Ato kilonseri ola madokba atema aitsü.
Karnataka nung election nüboyim sentong ka nung jembidang Rahul-i, “Gujarat nung Modi-i Lokayukta benoka meinyaker. Pa Ato kilonser kümer küm pezü jungogo saka Delhi nunga pai Lokpal mebenok,” ta aitsü.
Congress Tirisa, Modi-i pa ya linük nung ochimashi atema “chowkidar” (tanüker) lir, ta jembir, ajisüaka PNB ochimashi ken o nung pai ola madoker aser BJP Tir, Amit Shah’er jabaso, Jay Shah meyong company-i sen aika ajangzükba atema ola madoker, ta aitsü.
Ramagurga nung lokti senden nung jembidang pai, “Linük meyong chowkidar-i Karnataka-i arua par chief minister (taoba chief minister Yeddyurappa) den külemi ochimashi indang jembir, ajisüaka pa ya mapang ka nungbo tepoukdak liasü, iba den külemi BJP yimsüsüba mapang nung par minister pezüa tepoukdak yuogo,” ta aitsü.
Gandhi-i anogo asem atema Karnataka semdanga lir, aser tanünübuba nung pai, “Modi… onük jembitsü atema dang linük nüburtemi na Ato kilonser kümdaktsüba masü,” ta ashi.
Nirav Modi-i India nung sensakertem meyong sen crore aika auyaogo, ta shia Rahul-i, “Nirav Modi-i India nunger aluyimertem, sensakertem aser aayangertem meyong sen crore 22,000 auyaogo, ajisüaka asen chowkidar-i ola kata madoker,” ta aitsü.
Ato kilonseri election nüboyimba mapang nung mapa aika adokdaktsütsü ta nangzük aija aser aluyimertem dang sentsüh matokba aija Gandhi-i, “Modi…nai Siddaramaiah (Karnataka Chief Minister) nungi langka danga angazüktsüla,” ta ashi.
“Nai kechi inyakdir inyakaka nai Nirav Modi nunger ama nisungtem atema dang inyaker. Nai iba linük nung takartem nem sen crore aika agutsür, ajisüaka Karnataka nung onoki (Congress) sensaker shia nem angati jang seret tenet agutsür,” ta pai ashi.
Karnataka nung Assembly election April/May nung agitsü.