Sorkar machinery tim mesüi amshiba Congress-i anem

Itanagar, November 1 (Agencies): Arunachal Pradesh State Congress unit-i, Ato Kilonser office dang, sorkar machineries balala Minister of State for Home Affairs Kiren Rijiju-i tim mesüi amshiba tsütsü parnoki tetuyuba ka agütsütsü asoshi teyari meshiogo.
Osang benertem den tanü jembidang Arunachal Pradesh Congress Committee tir Takam Sanjoy-i ashiba agi, par party-i sorkar machineries balala, talisa Indian Air Force helicopter tem sorkar mapa atema masü, saka BJP pur rally aser senden balala atema MoS-i amshiba dak sendakba nung bushisüngdangtsü asoshi khangogo.
Paisa ashiba agi, party maparen balala atemabo MoS Home-i, Pawan Hans mesera Skyone helicopter services amshitettsü koka lir, saka pai sorkar indang service ang tim mesüi amshitsü asoshi shimteter.
“Iba inyakyim ya sorkar yimyim, ‘teraksa aser ochi mashi balala nungi jenbua aliba sorkar’, ta agüja aliba den khen yongi meputeper. MoS Home aser state Chief Minister nati iba amala inyakyim nung shilem agiba ya ner sorkar ‘Achhe Din,” policy den meputeper,” ta APCC pur shidi nung züluja lir.