Sorkar mapa asoshi dang mebilemi tanga mapatem inyaktsüla : Er. Levi

Dimapur, May 14 (TYO) : PWD (Housing) Parliamentary Secretary, Er. Levi Rengma-i Tseminyu sub-division kübok Sendenyu yimtsüng nung Council Hall lapoktsüogo.
Iba sentong nung Er. Levi-i tongti tesemdanger o jembidang, nisungtemi tenla agütsüba sen ajanga yimdaklirtemi council hall yangluba atema tenüngsang agütsü.
Nagaland nung zünger mapa mangurtem indang khuret onük lemsatepdang, Er. Levi-i ashiba agi, sorkar mapa dak dang rangloker malitsüla saka tanga mapatem inyaktsüla, ta ayongzük.
Mapa inyaktsü lenmang aisü lir, saka zünger mapa manguba lanurtem training maliba ajanga item mapa meinyakteter, ta paisa shisem.
Sorkar mapa dak dang ranglokba, tsürabur dak dang metaloker aliba, mapa inyaktsü azümesenba aser takoksa angutsüsa shishilembaba mapa tenzükdangbatem yimya agientsüla, ta PWD (Housing) Parliamentary Secretary-isa lanurtem ayongzük.
Paisa, Directorate of Evaluation-i ‘Nagaland state nung Naga nungertemi mapa meinyakba aser Non-Naga nungertem mapa inyakba’ indang asadangba osang metetdaktsüdang, “Nagaland nung sorkar mapa inyakertem dang nungibo Non-Naga (unskilled) nungertem nübo timba lir” ta ashi.
Dimapur, Kohima aser Mokokchung district tem nung Naga aser Non-Naga nungertemi shishilembaba dokan 13,380 nung Non-Naga nunger mapa inyaker 45,815 lir aser parnoki küm nung sen crore 450.60 shi aazüker. Asenoki iba ya kanga junga shisadangra, Nagaland nung mapa inyaktsü mali ta meshitettsü, ta Er. Levi-isa shisem.
Naga nungertemi mapa inyaktsü jangratsüla aser mapa inyakba aser shishilembaba maparen inyaktsü atema bilemtsüla, ta paisa ayongzük.
Iba sentong nung Additional Chief Secretary & Development Commissioner, R. Benchilo Thong,  ADC Tseminyu Vikhweno M. Meratsii aser Chief Engineer, Irrigation & Flood Control Njilo Kemp nungertemia o jembi.