Sorkar mapa inyaker asoshi ayongba Health Insurance training tembangogo

Commissioner & Secretary, H&FW, M.Patton IAS-i sorkar mapa inyaker asoshi ayongba Health Insurance den sentakba Orientation Training takok ngua agirtem nem kuli kaket lemshia agütsüba noksa nung angur. (Kohima, August 13, 2015)

Kohima, August 13 (TYO): Kohima kübok Directorate of Health & Family Welfare (H&FW) nung sorkar mapa inyaker asoshi ayonga agiba Health Insurance den sentakba Orientation Training sentong tanü Brehostibar nü tembangogo.
Iba training ya tan Mongolbar nü nungi tenzüka anogo 3 asoshi ayonga agia liasü.
“Asen Nagaland nung anema alitsüren den sentakba maparen tajungba küma melenshitsüji kanga dang rongdak mapatong ka kümogo. Nagaland ya welfare state ka asüba yong sorkari sorkar mapa inyakertem nem medical allowance aser medical reimbursement agütsür, saka yamaji inyakbaji tanü putu denbo mapet kümogo,” ta Commissioner & Secretary, H&FW, M. Patton, IAS-i tanü metetdaktsü.
“Tan sentong nung shilem agir sorkar mapa inyakertemi tajangzük tulu ngur alitsü imlar. Ano, Nagaland kanga dang meima nüngdakba teyari balala mapang shia agütsüba atema World Bank danga pelaba metetdaktsür,” ta pai ashi.
“Nagaland sorkari sentsü jenti atsüa khuret tulu benoka aliba yong nüburtem talisa, yimdak yimtsüngtem nung alir nem nüngdakba teyari peria magütsütetter,” ta Secretary, Finance, Y. Kikheto Sema, IAS-ia tanü sentong nung lemsatep.
Tang benokba aliba mapatong tajungba küma melenshitsütsü aser yimdaklirtem indang taküm jenjang tajungba kümdaktsütsü asoshi tan sentong nung shilem agirtemi bendanga agüja nüngdakba maparen inyaktsü asoshi pai ayongzük.
Tanü tembanga agiba sentong ya World Bank nungi teyari agia Nagaland sorkari ayonga agia liasü.