Sorkar mapa inyakertem office-i junga arudaktsüner: JYO

Dimapur, June 18 (TYO): Longchem block kübok department balala nung sorkar mapa inyakertem office-i junga maruba reprangteta Japukong Youth Organisation (JYO)-i sorkar mapa inyakertem dang station nung alitsü, aser office-i teti oa mapa inyaktsü mepishir, ta tanü Japukong Youth Organization Tir, Lanusunep aser tongti tezülur, Imlitenzük nati sangdong ka nung metetdaktsü.
Tamalen JYO-i Minister, Temjen Imna Along Longkumer aser Longchem nung EAC na ajurua iba onük benoka o lemtepogo.
“Longchem jila aser anameket aliba yimtsüngtem nung gari lenmang majungba atema JYO tebilemtsü akar. Mangkolemba nungi Longchem jila ajanga Yajang (c) yim tashi lenmang terabo junger, ajisüaka ano rongsenkettsüng atema kanga tongtibang lenmang- Longchem nungi Nakachari tashi lenmang ajanga tesem nung aliba nüburtem tajangzük kanga angur saka tia maka iba lenmang kanga mejungi lir,” ta sangdong nung shia lir.
“Lenmang nung black top ponger oadokogo. Mei mapang culverts ponger oadokogo aser ano meyanglui lir; garitem süng agi yangluba apu ajanga senzür. Tzüngluruwa mongpu nung Longchem jila aser temeket nung aliba yim timbaka ita aika tesendaktep lenmang malir. Iba kuliji ajanga osettsüset jenjang kanga atur. Tatishitsü agi- PDS jang alemtsü atema HQ Longchem nungi gari nung abenba jenjang atur, aser ibaji ajanga nüburtemi jenjang anasü jungnüa agütsütsüsa akümer. Tesüiba küm ishika yamaji ajangshia arudar,” ta kasa sangdong nung shia lir.
“State nung circle headquarters tejentiba rongnung Longchem densema lir, ajisüaka iba area atema melungsüa meinyaktsür, anungji JYO-i tim ketdangsertem dang Longchem den tesendakatep lenmang, talisa Longchem-Nakachari lenmang yanglushitsütsü mepishir,” ta JYO-isa metetdaktsü.