Sorkar mapa inyakertemi lungkak aitba ajanga timtem ajurur ; Cabinet-i sorkar mapa inyakertem dang mepishir

Kohima, March 27 (TYO) : Sorkar mapa inyakertemi tanü nungi ‘pen down strike’ tenzükba ajanga Nagaland State Civil Secretariat densema sorkar office tem nung timtem tulu ajuruogo.
March 1, 2017 anogo nung 7th Revision of Pay (ROP) inyakyim tenzüktsüla ta takhangba agütsüba ama state sorkari meinyakba atema Confederation of All Nagaland State Service Employees Association (CANSSEA)-i mapa meinyaki lungkak aittsü sentong agitsü lemtet.
State Services Associations-i January 1, 2016 nungi tenzüka 7th ROP mapa küma tenzüktsü atema mezüngbo takhangba agütsü, saka taküm March 1 nungiang tenzüktsü mulunga agizük, ta CANSSEA President S Takatuba Aier-i ashi.
State sorkari iba onük atema Cabinet Sub-Committee ka tentet saka parnoki onük mebentettetba ajanga sorkar mapa inyakertemi lungkak aittsüsa akümer, ta paisa ashi.
Hombarnü Cabinet-ia sorkar mapa inyakertem dang parnok mapa meinyaki lungkak aitba anenang ta mepishia metetdaktsüogo.
Yashi CANSSEA aser State Services Associations nungi lennirtem den senden amenba osang Hombarnü Cabinet Sub Committee-i Cabinet dang metetdaktsüogo. Onüktem kanga junga shisadanga jembiba sülen, sorkar mapa inyakertem dang lungkak aitba anentsü atema mepishitsü lemtet, ta Cabinet-isa ashi.
Cabinet Sub Committee ji state sorkar mapa inyakertemi agütsüba onüktem agizüka reprangshimtsü atema shimtetba lir aser iba onük asoshi olemtep alitsüla, ta Cabinet-isa metetdaktsü.
Parnokisa, Cabinet Sub-Committee dang Budget Session tembangba sülen CANSSEA lennirtem den ajurutepa telemtetba tajung ka agitsü tetuyuba agütsü aser CANSSEA o State Services Associations-i maneni Committee den olemteptsü mepishia metetdaktsü.