Sorkar mapa inyakertemi pei tajungtiba agi tenzüktsüla: Y Patton

Kohima, April 21 (TYO): Sorkari oshimashi anema raraba den yimjung aser terenlok atema inyaktsü, aser item nükjidong ataloktsü atema sorkar mapa nung alirtemi pei tajungtiba agi inyaktsüla, ta tanü Nagaland Home Minister, Y Patton-i metetdaktsü.
Administrative Training Institute (ATI), Kohima nung Civil Services Day sentong nung jembidang Patton-i, sorkar mapa inyaker timtiba aliba state rongnung Nagaland lir; state nütsüng lakh 20 shi nungi work charged densema sorkar mapa inyaker lakh 1.4 shi lir, ta metetdaktsü.
“Asenok tang tashi taila mapa nung alirtem aika aliba ya shisabulutsü onük ka lir. State-i kümshia sentong nung maliba nung sen jenti timba-timba intoker, koba ajanga nüburtem atema terenlok mapa inyaktsü asoshi sorkar senotsü ishiba akumer,” ta ashi.
Patton-isa sorkar mapa inyakertem dang, mapa nung aniokba mapang nangzükba ama nüburtem tajungtiba agi tenzüktsü atema asüngsashir inyaktsüla, ta ayongzük.
Tensa mapang melenshiba den liromedema tayongzükbatem koktettsü asoshi meyipshia reprangdanger tarutsü atema sentong yanglutsüla, ta ashi.
Government Servants’ Conduct Rules nung ajemdaker Home Minister-i züngsemtem dang sorkar mapa inyakba nung tatishitsü tajung sayur ka asütsü aser chichia nübur tenzüker ka asütsüla, ta ashi.
Iba anogomung nung Home Minister-isa Personal Information & Management System (PIMS) aser Personal & Administrative Reforms Department indang website lapoktsüogo, kong Civil list 2016 aser office indang tongtibang osangtem angutsü.
Chief Minister PS & Finance Commissioner, Temjen Toy lenisüba nung agiba sentong nung Chief Secretary, Pankaj Kumar-i okila jembi aser Secretary P&AR & Tourism Department, Angau I. Thou-i tepela anküp o jembia liasü.
Anogo ananü sentong asüng tembangtsü, aser asüng sentong nung Communitisation aser state nung Village Development Board inyakyim indang jembitsü.