Sorkar mapa nung ochimashir atema ozüng tasen benoktsü: Assam CM

Guwahati, July 03 (Agencies): Deobarnü Assam sorkari, PSU staff aser autonomous tentet densema sorkar mapa inyaker ochimashirtem nem temerenshi agütsütsü atema ozüng tasen yanglutsü, ta metetdaktsü.
Sorkar sangdong ka ajanga ashiba agi, Assam Chief Minister, Sarbananda Sonowal-i Chief Secretary, VK Pipersenia dang Minister tem, MLA tem, taoba Minister tem, taoba MLA tem aser mapa nungi anisüngzüker aliba ketdangsertem rongsen aser kiojen asadangtsü atema ozüng ka yanglutsü asoshi mapatong ka renemang ta tuyuogo.
Public Sector Undertakings (PSU) ketdangsertem aser autonomous bodies-a ozüng tasenba kübok aittsü, koba ajanga ochimashi tera nungi atsüdoktsü, ta kasa sangdong nung shia lir.
“Ochimashi tera nungi atsüdoktsü atema ozüng tasenba nungji talenba tali bendenloktsü aser pei rongsen/kiojen ji pei income dak mapet süra itemji meyipa agiba densema temerenshi tesashi benoktsü,” ta Chief minister, Sonowal-i ashi.
Iba inyakyim nungji state sorkar mapa nung grade-I aser grade-II ketdangsertemi December 31 nü tashi nung pei rongsen osang agütsütsü atema inyaktsü chief minister-i tuyuogo.
Ozüng tasentem mebenshir ketdangsertem nem mapang shitak nung promotion magütsütsü, bank loan aser passport magütsüba densema temerenshi tulu alitsü.