Sorkar mapa nung shimba inyakyim latettsü : CM

Kohima, November 19 (TYO) : Nagaland sorkar kübok aliba department ajak nung mapa inyaker shimbaren nung kecha miima meyui ajaki meteta ochishia aser shitak shimtsü asoshi yakta inyakyim ka latettsü ta Chief Minister Mr T.R Zeliangi metetdaktsüogo.
Tanü Chakhesang Students’ Union (CSU) purtemi pa ajurua jembidang iba o ya metetdaktsü. Kija aser lokti tentet aikati sorkar mapa nung shimba yimya aija ola adokba angashiogo aser iba ama tim mesüi inyakba nokdangtsü atema sorkar temulungtetba tulu lir ta Chief ministerisa metetdaktsü.
“Tang Education department-i ita sen agibaji state sorkar mapa inyakertem ajak ita sen noklang shilem nung 24% agir, anungji taoba kümtem nung inyaker talila shimoka aliba agientsü asoshi mapa tenzükogo,” ta T.R.Zeliangisa CSU lenirtem dang ashi.
Iba mapang CSU lenirtemi CM dang ashiba agi, sorkar mapai aitsüba ya yimten nung tashi alirtem asoshi dang masü saka mapa bushir lanurtem ajak kasasa maongka angutsüsa inyakdaktsüner ta metetdaktsü.
” Ni tonga orr Army aser Assam Rifles purtem shimba maparentem nguogo aser ibaji kanga indang indanga shitak shimba reprangtetogo. Iba amaji state nunga police shimba maparen nung amshitsü akok,” ta T.R.Zeliangisa CSU purtem dang metetdaktsü.
Sorkar mapa nung shimokba inyakyim nung ochimashi reprangteta okadak ken o benokba indang asüngdang dang, iba ama inyakba jagia taginüba matongtsüa akok. ACAUT purtemia sorkar mapa nung timi maniokba ochimashi mapa anema okadak benok saka ano okadak nung jagi Union sorkar nem agütsü, anungji ibaji mapang talangka agitsüa akok. State sorkari itemji metongshia inyaktsü asoshi mulunga dang lir, anungji ajaki aremzüka atadaktsüner ta Chief ministerisa CSU purtem ajanga mepishia metetdaktsü.